સમૃદ્ધ ગણાતા પશ્ચિમ ઝોને પ્રોપર્ટી ટેક્સ વિભાગમાં મ્યુનિ. તિજોરી છલકાવી દીધી

તંત્રને ૧૭ ઓગસ્ટ સુધીમાં કુલ ૩. ૭૬૯.૫૩ કરોડની આવક થઈ

અમદાવાદ, શુક્રવાર

શહેરના તમામ સાત ઝોન પૈકી સુખી, શિક્ષિત અને સમૃદ્ધ ગણાતો પશ્ચિમ ઝોન કોરોનાકાળ દરમિયાન વેક્સિનેશનમાં હંમેશાં અવ્વલ નંબરે રહ્યો હતો. કેટલાક વિસ્તારમાં લોકો વેક્સિન લેવાથી એક અથવા બીજા કારણસર દૂર રહેતા હતા ત્યારે આ ઝોનના નાગરિકો સામે ચાલીને વેક્સિનેશનમાં તંત્રને સહયોગ આપતા હતા. પ્રોપર્ટી ટેક્સની આવકના મામલે પણ વર્ષોથી પશ્ચિમ ઝોન સાતેય ઝોનમાં હંમેશાં મોખરે રહ્યો છે. ચાલુ નાણાકીય વર્ષ ૨૦૨૩-૨૪માં પશ્ચિમ ઝોનમાંથી તંત્રએ રૂ. ૨૦૦ કરોડથી પણ વધુની આવક મેળવીને મ્યુનિ. તિજોરીને ફરી છલકાવી દીધી દેતા પ્રોપર્ટી ટેક્સ વિભાગ ખુશખુશાલ થયો છે.