દબંગ પોલીસઃ ૨૦૦થી વધુ કારમાં લગાવેલી બ્લેક ફિલ્મ ઉતારી, સંખ્યાબંધ હથિયાર પણ જપ્ત કર્યાં

પોલીસનું મોડી રાતે કોમ્બિંગઃ વાહનચાલકોને દંડ્યા, ઈન્ચાર્જ સીપી, જેસીપી, ડીસીપી, એસીપી સહિત પોલીસનો કાફલો તહેનાત

અમદાવાદ, શુક્રવાર શહેરમાં ગુનાખોરીનો ગ્રાફ નીચો કરવા માટે પોલીસ હવે દબંગ બની ગઇ છે. મોડી રાતે પોલીસે શહેરમાં ઠેર ઠેર કોમ્બિંગ હાથ ધરીને ગુનેગારોને અંડરગ્રાઉન્ડ થવા પર મજબૂર કરી દીધા હતા. ઇન્ચાર્જ પોલીસ કમિશનર, જોઇન્ટ પોલીસ કમિશનર, ડીસીપી, એસીપી, પીઆઇ સહિત પોલીસની ટીમ મોડી રાતે મેદાનમાં ઊતરી હતી અને રસ્તા પર શોબાજી કરતા વાહનચાલકો વિરુદ્ધ કાર્યવાહી કરી હતી. પોલીસે ૨૦૦થી વધુ કારમાં લગાવેલી બ્લેક ફિલ્મ ઉતારી હતી, જ્યારે છરી, ચપ્પા જેવાં સંખ્યાબંધ હથિયાર જપ્ત કર્યાં હતાં. આ સિવાય દારૂની બોટલો લઇને જતા નબીરાઓને પણ ઝડપી લીધા હતા. ફેન્સી નંબર પ્લેટ તેમજ ટ્રાફિકના નિયમોની ઐસી કી તૈસી કરનાર વાહનચાલકોને પણ દંડ્યા હતા.

નહેરુનગર અને કાગડાપીઠ પોલીસ સ્ટેશન નજીક થયેલી હત્યાની બે ઘટના બાદ શહેર પોલીસ એક્શન મોડ પર આવી ગઇ છે અને ગુનાખોરીના ગ્રાફને કંટ્રોલમાં કરવા માટે મેદાનમાં ઊતરી છે. પોલીસે રાતે નવ વાગ્યાથી લઇને ૧૨ વાગ્યા સુધી કોમ્બિંગ હાથ ધર્યું હતું. જેમાં ઉચ્ચ અધિકારીઓ પણ જોડાયા હતા.