ઘટસ્ફોટ ટાર્ગેટ પૂરો કરવા માટે પોલીસે નિર્દોષ લોકોને ‘બલિનો બકરો' બનાવ્યા

ખાણી-પીણીની લારી તેમજ ચિકન-મટનની દુકાનના વેપારીઓને ઝડપીને હથિયાર બતાવી દેવાયાઃ ઉચ્ચ અધિકારીઓ અજાણ

શહેરમાં ગુનાખોરી હદ વગરની વધી ગઇ છે, જેના કારણે શહેરીજનોમાં રોષની સાથે-સાથે ફફડાટ જોવા મળી રહ્યો છે. સક્ષમ અને પ્રામાણિક પોલીસ કર્મચારીઓની ફોજ હોવા છતાંય અમદાવાદીઓ પોતાની જાતને અસુરક્ષિત મહેસૂસ કરી રહ્યા છે. વધતી જતી ક્રાઇમની ઘટનાઓને કંટ્રોલમાં કરવા માટે પોલીસ તેમજ ઉચ્ચ અધિકારીઓ મેદાનમાં ઊતર્યા છે અને ધાર્યા કરતાં વધુ સારી કામગીરી કરી રહ્યા છે, પરંતુ તેમાં એક ચોંકાવનારો પર્દાફાશ થયો છે. મોડી રાતે કોમ્બિંગ દરમિયાન પોલીસ છરી, ખંજર, ધારિયા જેવાં હથિયારો સાથે માથાભારે તત્ત્વોને ઝડપી રહી છે. નાગરિકોને ખુશ કરવા માટેની પોલીસે કરેલી કામગીરીનું આ અધૂરું સત્ય છે. પોલીસની કામગીરીની પૂરી હકીકત સામે આવતાં લોકોને કાયદોવ્યવસ્થા પરથી વિશ્વાસ ઊઠી જશે.

ખાણી-પીણીની લારી તેમજ નોનવેજની દુકાન ધરાવતા લોકોને પોલીસ દ્વારા આરોપી બનાવી તેમની પાસે હથિયાર બતાવી દેવાય છે. પોલીસ ચોપડે કામગીરી બતાવવા માટે અને અધિકારી ઓને રાજી કરવા માટે પોલીસના કેટલાક કર્મચારીઓ તદન ખોટું કરી રહ્યા છે. જે નિર્દોષ લોકો ધંધો કરીને પોતાની રોજી-રોટી રળે છે તેમને જ આરોપી બનાવી દેવાય છે. ઉચ્ચ અધિકારીઓ પોલીસ કર્મચારીઓની આ કામગીરીથી અજાણ છે, પરંતુ પોલીસ વિભાગની સાચી હકીકત આ જ છે.