બની બેઠેલા ‘ડોન' જીશાનની હકીકતઃ ડ્રગ્સ કરતાં હથિયાર તસ્કરીની દુનિયાનો સૌથી મોટો સોદાગર

અમદાવાદમાં જીશાને હથિયાર તસ્કરીતી શરૂઆત કરી: ક્રાઈમ બ્રાંચે તપાસ તેજ બતાવી

દાણીલીમડા ખાતેથી થોડા દિવસ પહેલાં ક્રાઇમ બ્રાંચે રૂ. ૧.૨૩ કરોડના એમડી ડ્રગ્સ, બે ઓટોમેટિક પિસ્તોલ તેમજ જીવતા કારતૂસ, રોકડ સાથે ઝડપેલા માફિયા જીશાન ઉર્ફે દત્તા પાવલેની ઘણી ચોંકાવનારી હકીકતો સામે આવી છે. જીશાન ઉર્ફે દત્તા પાવલેને ડોન બનવાના અભરખા હતા, જેના કારણે તેણે લોકોને હથિયાર બતાવવા નું શરૂ કર્યું હતું. જીશાન એમડી ડ્રગ્સનો નશો કરીને માથાભારે તત્ત્વોને હથિયાર બતાવીને આતંક મચાવતો હતો. આ સાથે તેના ડ્રગ્સની સિન્ડિકેટમાં સંખ્યાબંધ લોકોનો પર્દાફાશ ક્રાઇમ બ્રાંચે કર્યો છે. આથી ડ્રગ્સ કરતાં હથિયારોનો સૌથી મોટો સોદાગર જીશાન હોય તેવું ક્રાઇમ બ્રાંચનું માનવું છે.

જો જીશાન મેમણની ક્રાઇમની કુંડળી પર નજર કરવામાં આવે તો તેણે રામોલમાં વાહનો સીઝ કરતા એક યુવક પર ફાયરિંગ કર્યું હતું. આ સાથે રિલીફ રોડ પર એક યુવકને હથિયાર બતાવ્યું હતું. થોડા દિવસ પહેલાં નશાની હાલતમાં મણિનગરમાં યુવતીઓ પર રોફ મારતો હતો અને હથિયાર બતાવ્યું હતું. આ સિવાય ક્રાઇમ બ્રાંચે જીશાનની એમડી ડ્રગ્સ અને હથિયાર સાથે પણ ધરપકડ કરી છે.