વાવાઝોડું ‘ફેંગલ’ આજે પુડુચેરીના દરિયાકાંઠે ત્રાટકશેઃ અનેક વિસ્તારમાં ભારે પવન સાથે વરસાદનું એલર્ટ

તામિલનાડુ-પુડુચેરીની શાળા અને કોલેજોમાં રજા જાહેર કરી દેવાઈ

દેશના લોકો હાલમાં અલગ અલગ વાતાવરણનો સામનો કરી રહ્યા છે. કેટલાંક રાજ્યમાં ગાઢ ધુમ્મસ છવાયું છે, જેના કારણે વાહન વ્યવહાર અને જનજીવન અસ્તવ્યસ્ત બન્યાં છે તો કેટલાંક રાજ્યના લોકો ઠંડીમાં ઠૂંઠવાઈ રહ્યા છે. પહાડી વિસ્તારમાં હિમવર્ષા થઇ રહી છે, જ્યારે દક્ષિણ ભારતનાં રાજ્યમાં હજુ પણ શિયાળામાં ચોમાસા જેવો માહોલ છે. દક્ષિણ-પશ્ચિમ બંગાળની ખાડીમાં રચાયેલા ડીપ ડિપ્રેશને ગઈકાલ બપોરે ચક્રવાતી તોફાનનું રૂપ ધારણ કર્યું છે, જેના કારણે હવામાન વિભાગે આ વિસ્તારમાં ભારે પવન સાથે વરસાદનું એલર્ટ જારી કર્યું છે. આ વાવાઝોડાના પગલે તામિલનાડુ, પુડુચેરી અને તેની નજીકના દક્ષિણ આંધ્રપ્રદેશના દરિયા કિનારાના વિસ્તારમાં ભારેથી અતિભારે વરસાદની આગાહી કરવામાં આવી છે, સાથે જ વિદ્યાર્થીઓની સાવચેતી માટે દક્ષિણ આંધ્રપ્રદેશ, તામિલનાડુ, પુડુચેરીની શાળા-કોલેજોમાં રજા જાહેર કરવામાં આવી છે.