કોમ્બિંગ નાઈટ વચ્ચે લોહિયાળ જંગઃ દારૂતા રૂપિયા નહીં આપતાં યુવકને છરી મારી દીધી

શાહપુરનો બનાવઃ દારૂડિયો ચિક્કાર દારૂ પીતે આવ્યો અને યુવક પર હુમલો કરી દીધો

કોમ્બિંગ નાઇટ સાંભળતાંની સાથે જ શહેરીજનોને લાગતું હશે કે આપણું અમદાવાદ સુરક્ષિત છે. કાતિલ ઠંડીમાં મોડી રાતે પોલીસ એકાએક એક્શન મોડ પર આવી જાય છે અને ઠેરઠેર બંદોબસ્ત ગોઠવીને કોમ્બિંગ હાથ ધરતી હોય છે. મોડી રાતે શહેરને પોલીસ છાવણીમાં ફેરવી દેવાય છે અને સંખ્યાબંધ વાહનોનું ચેકિંગ કરવામાં આવે છે. પોલીસની કામગીરી પ્રશંસનીય છે, પરંતુ તેની કામગીરીમાં ક્યાંક ને ક્યાંક ચૂક રહી જતી હોય તેવું લાગી રહ્યું છે. શહેર પોલીસ છાવણી બની ગયું છે ત્યારે છરીથી હુમલો કરવાના નાના-મોટા બનાવો બન્યા છે. શાહપુર વિસ્તારમાં દારૂ પીવાના રૂપિયા માગવા બાબતે એક યુવક પર દારૂડિયાએ છરી વડે હુમલો કરી દીધો છે. હુમલા બાદ યુવક હાલ જીવન-મરણ વચ્ચે ઝોલાં ખાઈ રહ્યો છે ત્યારે પોલીસની કામગીરી પર અનેક સવાલ ઊભા થયા છે.

શાહપુર વિસ્તારમાં રહેતાં હીરાબહેન પરમારે માધવપુરા પોલીસ સ્ટેશનમાં હિમાંશુ વાણિયા વિરુદ્ધ હત્યાની કોશિશની ફરિયાદ કરી છે. હીરાબહેન પરમાર રાજસ્થાન હોસ્પિટલમાં નર્સ તરીકે કામ કરે છે અને ગુજરાન ચલાવે છે. હીરાબહેન છે પરમારને બે દીકરા અને એક દીકરી છે. હીરાબહેનનો નાનો દીકરો નિકુંજ પરમાર થોડા દિવસ પહેલાં પ્રેસમાં નોકરી કરતો હતો, પરંતુ તેણે નોકરી છોડી દીધી હતી અને બે દિવસ પછી ફાર્માસ્યુટિકલ કંપનીમાં નોકરીએ લાગવાનો હતો. નિકુંજનું નોકરી કરવાનું સપનું શાહપુર શક્તિનગરમાં રહેતા હિમાંશુ વાણિયાએ રોળી નાખ્યું છે.