દારૂની બોટલો અથડાઈને તૂટે નહીં તે માટે તેના પર મોજાં પહેરાવતા બુટલેગર્સ

દારૂની બોટલો અથડાય તો પોલીસને જાણ થઈ જતી હોવાથી નવો કીમિયો અજમાવ્યો બુટલેગર્સની નવી મોડસ ઓપરેન્ડી સામે પોલીસ-એજન્સી પણ એલર્ટ બન્યાં

સામાન્ય રીતે મોજાં પગમાં અને હાથમાં પહેરવા માટે ઉપયોગમાં આવતાં હોય છે, પરંતુ બુટલેગર્સ મોજાંનો ઉપયોગ કંઇક અલગ રીતે કરી રહ્યા હોવાનો ઘટસ્ફોટ થયો છે. બુટલેગર્સ દારૂની બોટલો ઉપર મોજાં પહેરાવી રહ્યા હોવાનો પર્દાફાશ થયો છે. દારૂની બોટલો એકબીજા સાથે અથડાવવાથી તૂટી ના જાય અને તેનો અવાજ આવે નહીં તે માટે પગમાં પહેરવાનાં મોજાં ચઢાવવામાં આવી રહ્યાં છે. એક બોટલ પર એક મોજું તેમજ દરેક દારૂની બોટલો પર મોજાં લગાવવામાં આવે છે. બુટલેગર્સની આ મોડસ ઓપરેન્ડીથી પોલીસ પણ ચોંકી ઊઠી છે. બોડકદેવ તેમજ સોલા પોલીસ સ્ટેશનમાં છેલ્લા એક અઠવાડિયામાં દારૂના બે કેસ નોંધાયા છે, જેમાં ખેપિયા તેમજ બુટલેગરે દારૂની બોટલને પગનાં મોજાંમાં મૂકી હતી. બુટલેગરની આ કરામત જોઇને પોલીસ પણ વિચારમાં મુકાઇ ગઇ હતી.