ગાઢ ધુમ્મસ-બરફીલા પવનો સાથે કાતિલ ઠંડીનો રાઉન્ડ શરૂઃ નલિયામાં ૬.૪ ડિગ્રી

રાજ્યનાં મોટા ભાગતાં શહેરોનું તાપમાન પાંચ ડિગ્રી જેટલું ગગડ્યું

હવામાન વિભાગે આપેલી ચેતવણી અનુસાર જ ગત મોડી રાતથી અમદાવાદ સહિત રાજ્યભરમાં કાતિલ ઠંડીના નવા રાઉન્ડનો પ્રારંભ થઈ ગયો છે. આજે સવારે પણ ગાઢ ધુમ્મસની ચાદર વચ્ચે ઠંડાગાર બરફીલા પવનો ફૂંકાતાં લોકો થથરી ઊઠ્યા હતા. કચ્છના નલિયામાં લઘુતમ તાપમાન ફરી એક વખત સાત ડિગ્રીથી નીચે સરકી ગયું છે અને આજે સવારે ૬.૪ ડિગ્રી ઠંડી નોંધાતાં નલિયાવાસીઓ તોબા પોકારી ઊઠ્યા હતા. રાજ્યનાં મોટા ભાગનાં શહેરોનું લઘુતમ તાપમાન પાંચ ડિગ્રી જેટલું ગગડી ગયું છે. સૌરાષ્ટ્રના રાજકોટમાં આજે ૮.૨ ડિગ્રી, જ્યારે કચ્છના ભૂજમાં ૧૦.૮ ડિગ્રી ઠંડી નોંધાઈ છે.