અમદાવાદીઓનું પ્રી-ઉત્તરાયણ સેલિબ્રેશન શરૂઃ ચટાકેદાર ઊંધિયા અને કચોરીની ભારે ડિમાન્ડ

શનિવાર-રવિવારની રજા આવતી હોવાથી પતંગ રસિયામાં ઉત્સાહઃ શહેરીજનો ઉત્તરાયણ તેમજ વાસી ઉત્તરાયણમાં કરોડો રૂપિયાનું ઊંધિયું આરોગશે

પતંગરસિયાઓ અને સ્વાદપ્રિય અમદાવાદીઓ તથા તથા ગુજરાતીઓ માટે ઉત્તરાયણની મજા ઊંધિયા વગર અધૂરી ગણાય છે. ઉત્તરાયણ પર્વ પૂર્વે જ અત્યારે અમદાવાદીઓ પ્રીઉત્તરાયણ સેલિબ્રેશન કરી રહ્યા છે, જેમાં ચટાકેદાર ઊંધિયું અને કચોરી હોટ ફેવરિટ છે. આગામી દિવસોમાં અમદાવાદી ઓ કરોડો રૂપિયાનું ઊંધિયું ઝાપટી જશે. વિશ્વભરમાં પ્રચલિત થયેલું ઊંધિયું શિયાળાના માત્ર ચાર મહિનામાં જ લાખો લોકોના ભોજનને સ્વાદિષ્ટ બનાવે છે.

અમદાવાદીઓ ઉત્સવપ્રિય તરીકે ઓળખાય છે. કોઈ પણ તહેવાર હોય તેઓ રંગેચંગે ઊજવે છે. ઉત્તરાયણ આવે ત્યારે તેઓ બે દિવસ સુધી ઉત્તરાયણનું પર્વ ઊજવે છે અને આ દરમિયાન ચટાકેદાર ઊંધિયું પણ તેઓ ઝાપટી જતા હોય છે. ઉત્તરાયણના પર્વ પર તેઓ માત્ર પતંગ જ નથી ચગાવતા, પરંતુ દિવસ દરમિયાન તેઓ ઊંધિયું કચોરી અને ગાજરનો હલવો પણ ખાવાનું પસંદ કરે છે.