લોકોના ભારે ધસારાના પગલે RTO ટેસ્ટ ટ્રેક મોડા સમય સુધી ધમધમ્યા

સોફ્ટવેરની ખામીના લીધે સતત ત્રણ દિવસ ટ્રેક બંધ રહ્યા આજે પણ લાંબી લાઈનો લાગી

અમદાવાદ સહિત રાજ્યભરના આરટીઓ ડ્રાઈવિંગ ટેસ્ટ ટ્રેક છેલ્લા ત્રણ દિવસથી બંધ રહ્યા બાદ ગઈ કાલે ફરી શરૂ થતાં અરજદારોનો ભારે ધસારો જોવા મળ્યો હતો. ગત બુધવાર, ગુરુવાર અને શુક્રવારે ટેસ્ટ ટ્રેક બંધ રહ્યા બાદ શનિવારરવિવારની રજાઓ પછી લાંબા સમયગાળાએ કામગીરી શરૂ થતાં પ્રાદેશિક વાહન વ્યવહાર કચેરી, અમદાવાદ આરટીઓ વિભાગે ૬૦૦ જેટલી એપોઇન્ટમેન્ટ રિશેડ્યૂલ કરી હતી, પરંતુ તે છતાંય પૂરું પડે તેમ નથી, કારણ કે બેકલોગ મોટી સંખ્યામાં છે. એક શિફ્ટની કામગીરી ગઈ કાલે વધા૨વા છતાં આજે સવારથી ડ્રાઇવિંગ ટેસ્ટ ટ્રેક પર અત્યારે ભારે ધસારો અને લાઈનો જોવા મળી રહી છે, જેમની એપોઇન્ટમેન્ટ આજે રિશેડ્યૂલ થઈ છે તે અરજદારો ગમે તેવા તાપમાં શેકાઈને પણ આજે ડ્રાઇવિંગ ટેસ્ટ આપવાનું કામ પૂરું કરવાની તૈયારી સાથે આવ્યા છે.