1,900க்கும் மேற்பட்டோர் கூட்டுப் பயிற்சி

சிங்கப்பூர் ஆயுதப் படையும் ஆஸ்திரேலியத் தற்காப்புப் படையும் இணைந்து 1,900க்கும் மேற்பட்டோரை உள்ளடக்கிய இரு தரப்புக் கூட்டுப் பயிற்சியில் ஈடுபட்டுள்ளன.

ராணுவம், சிங்கப்பூர் குடியரசு கடற்படை, சிங்கப்பூர் குடியரசு ஆகாயப்படை என முப்படைகளும் கலந்துகொள்ளும் ‘எக்சர்சைஸ் டிரைடன்ட்' (Exercise Trident) எனும் இந்தப் பயிற்சி, ஆஸ்திரேலியாவின் ராக்ஹேம்டனின் ஷோல்வாட்டர் பே பயிற்சிப் பகுதியில் நவம்பர் 1ஆம் தேதி முதல் 15ஆம் தேதி வரை நடைபெறுகிறது.

இந்தப் பயிற்சியின்போது இரு நாட்டுப் படைகளும் கடலிலிருந்து கரைவரை கடற்படையின் Fast Craft Utility (FCU), Fast Craft Equipment and Personnel (FCEP) ஆகிய அதிவேக படகு வகைகளைக் கொண்டு கடல்வழி படைகளையும் வாகனங்களையும் செலுத்துவர். எஃப்சியு படகு 18 டன் எடையை ஏற்றிச் செல்லும் ஆற்றலுடையது.

அந்த இருவகை படகுகளும் கடற்படையின் Landing Ships Tank (LST) எனும் வாகனங்களையும் சரக்குகளையும் சுமந்து செல்லும் இரு போர்க்கப்பல் வகைகளான ஆர்எஸ்எஸ் என்டூயரன்ஸ் (RSS Endurance), ஆர்எஸ்எஸ் பெர்சிஸ்டன்ஸ் (RSS Persistence) ஆகியவற்றிலிருந்து செலுத்தப்படுகின்றன.

இந்த இரு போர்க்கப்பல்களும் படகுகளைச் செலுத்துவதோடு ஹெலிகாப்டர்களைத் தரையிறக்கவும் புறப்படச் செய்யவும் தளங்களைக் கொண்டுள்ளன.

கப்பலிலிருந்து கரைவரை படைகளை ஆகாயம் வழி செலுத்தும் பணியில் CH-47F ரக சினூக் ஹெலிகாப்டர்கள் மற்றும் H225M ஹெலிகாப்டர்கள் ஈடுபடுகின்றன.