‘சுற்றுச்சூழல் குறித்த தவறுகளின் தாக்கமே பருவநிலை மாற்றம்’

பசுமை இலக்கியம், சுற்றுச்சூழல் குறித்த புதிய வாழ்வியல் கண்ணோட்டங்களை வழங்கியது, விருதுபெற்ற இயற்கைப் பாதுகாவலரும் எழுத்தாளருமான தியடோர் பாஸ்கரனோடு அண்மையில் நடந்த உரையாடல்.

நவம்பர் 8 முதல் 17ஆம் தேதி வரை ‘தி ஆர்ட்ஸ் ஹவுஸ்’ஸில் நடைபெறும் சிங்கப்பூர் எழுத்தாளர் விழாவின் நிகழ்ச்சிகளில் ஒன்றாக நவம்பர் 9ஆம் தேதி சனிக்கிழமை பிற்பகல் இது நடந்தது.

தேசிய விருதான ஸ்வர்ண கமல் விருது (1997), இந்தியாவின் புகலரண் இயற்கை அறக்கட்டளையின் வாழ்நாள் சேவை விருது (2020) உள்ளிட்ட பல விருதுகளை வென்ற பெருமை திரு பாஸ்கரனைச் சேரும்.

அவரது எழுத்தும் கருத்துகளும் உலகளவில் ஏற்றுப்போற்றப்படும் நிலையில், ஏறக்குறைய 25 சிங்கப்பூர் எழுத்தாளர்களையும் வாசகர்களையும் நிகழ்ச்சி ஈர்த்திருந்தது.

இயற்கை சார்ந்த எழுத்துகள் எவ்வாறு சுற்றுப்புறப் பாதுகாப்பிற்குப் பங்களிக்கின்றன? பசுமை இலக்கியம் என்னென்ன வகைப்படும்? எனப் பல கேள்விகளுக்கும் அரை மணிநேர உரையில் விளக்கினார் திரு பாஸ்கரன். அதன்பின்பு, எழுத்தாளர் சிவானந்தம் நீலகண்டன் அவருடனான உரையாடலை வழிநடத்தினார்.