சேவைத்துறைச் சிறப்புக்கான ‘தங்க சேவை’ விருது

பணி மாற்றத்தை ஆவலுடன் எதிர்பார்த்து, சிங்கப்பூர் ஹோட்டல் துறையில் காலடி எடுத்து வைத்த திரு ரமேஷ் தியாளன் கோவிந்தராஜு, 24 ஆண்டுகளாக ஹோட்டல் சேவைக்குழுவில் பணிபுரிந்து வருகிறார்.

- கீர்த்திகா ரவீந்திரன்

குறிப்பாக, உடல் நலமற்ற விருந்தினர்களை அக்கறையுடன் கவனித்து வரும் ரமேஷ், சக்கர நாற்காலிகளுக்கு ஏற்பாடு செய்தல், விருந்தினர் நலத்தை அவ்வப்போது விசாரித்தல் என்று அவர்களுக்கு முன்னுரிமை அளித்து வந்தார்.

சேவைத் துறையின் தொடக்கத்தில் பல சவால்களை எதிர்கொண்டாலும், முகமலர்ச்சியோடு விருந்தினர்களிடம் அன்பாகப் பேசி, உபசரித்து, அவர்களுக்குத் தேவையானதைத் தொடர்ந்து நிறைவு செய்து வருகிறார் திரு ரமேஷ்.

“பொறுமை என்பது சேவைத்துறையில் பணிபுரியும் அனைவருக்கும் அவசியம். அது சாதனைகளுக்கு வழிவகுக்கும்,” என்று தெரிவித்தார் திரு ரமேஷ்.

நவம்பர் 8ஆம் தேதி அன்று ‘வோகோ ஆர்ச்சர்ட்’ விடுதியில் நடைபெற்ற தங்க சேவை விருது (Service Gold Award 2024) நிகழ்ச்சியில் தமது உன்னத சேவைக்காக திரு ரமேஷ் அங்கீகரிக்கப்பட்டார்.