மரபுடைமைப் பாதுகாப்பு தரத்தை உயர்த்தியுள்ள வழிபாட்டுத் தலங்கள்

சவுத் பிரிட்ஜ் சாலையில் அமைந்துள்ள ஸ்ரீ மாரியம்மன் கோயிலை அண்ணாந்து பார்ப்போர், காலத்தால் அழியாத அதன் பாரம்பரியத்தை உடனே உணர்ந்திடுவர்.

- யோகிதா அன்புச்செழியன்‌

தென்னிந்திய பாரம்பரிய கட்டடக்கலை பாணியில் வடிவமைக்கப்பட்டுள்ள இக்கோயில், சிங்கப்பூரின் ஆக பழைமையான இந்துக் கோயிலாகும். கடந்த ஆண்டு பிப்ரவரி 12ஆம் தேதி ஸ்ரீ மாரியம்மன் கோயிலின் குடமுழுக்கு விழாவில் சுமார் 20,000க்கும் மேற்பட்ட மக்‌கள் கலந்துகொண்டு புதுப்பிக்கப்பட்ட கோயிலின் அழகைக்‌ கண்டு மகிழ்ந்தனர்.

இருப்பினும், பல ஆண்டுகாலமாக வானிலையாலும் கோயிலில் நடைபெற்ற நிகழ்ச்சிகளாலும் கோயில் சற்று சேதமடைந்த நிலையை எட்டவே, புதுப்பிப்புப் பணிகள் அங்கு மேற்கொள்ளப்பட்டன.

உயர் தொழில்நுட்பத்துடன் நடந்த மறுசீரமைப்பு

கிட்டத்தட்ட $3.5 மில்லியன் செலவில் 2021ஆம் ஆண்டு தொடங்கப்பட்ட கோயிலின் மறுசீரமைப்புப் பணித்திட்டம், ‘கெய்டு ஆர்கிடெக்ட்ஸ்’ (CAIDE Architects), ‘மேக் கன்சல்டிங்’ (Maek Consulting) ஆகிய நிறுவனங்களுடன் இணைந்து இந்து அறக்கட்டளை வாரியத்தால் வழிநடத்தப்பட்டது.

“கோபுரங்களும் விமானங்களும் அதிகம் பழுதடைந்திருந்ததால் அவற்றைக்‌ கழுவி மீண்டும் வண்ணம் தீட்டுவது சவாலாக இருந்தது,” என்றார் இந்து அறக்கட்டளை வாரியத்தின் தலைவர் திரு ராஜன் கிருஷ்ணன்.

இதற்கு உதாரணமாக, அவர் ராஜ கோபுரத்தை எடுத்துக்காட்டினார்.

“பல ஆண்டுகளாக சிற்பங்களின் மீது சாயம் அடுக்கடுக்காகப் பூசப்பட்டு வந்ததால் அவற்றின் கண்கள், மூக்கு, ஆபரணங்கள் போன்ற நுட்பமான வேலைப்பாடுகள் மங்கிக் காணப்பட்டன. இதைச் சரிசெய்ய இதுவரை பூசப்பட்ட சாயம் அனைத்தையும் அகற்ற முடிவு செய்தோம்.

“முன்பு பூசப்பட்ட சாயங்களை முற்றிலும் அகற்ற மூன்று முதல் நான்கு மாதங்கள் ஆகின. ஒவ்வோர் அடுக்குச் சாயத்தையும் அகற்றியபோது அதன் காலகட்டத்தையும் நிலையையும் தீர்மானிக்க ஆய்வுகள் செய்யப்பட்டன,” என்று விளக்கினார் அவர்.

ஆளில்லா வானூர்தியைக் கொண்டு முப்பரிமாண ஒளிப்பட அளவியல் ஸ்கேன் (3D photogrammetry scan), ரசாயனப் பகுப்பாய்வு ஆகியவற்றைப் பயன்படுத்தியபோது, நீண்ட காலமாக மறைந்திருந்த இரண்டு துவாரபாலகர்களின் சுவர் ஓவியங்கள் போன்ற முக்கியமான வரலாற்றுக் கூறுகள் கண்டுபிடிக்கப்பட்டன.