பல்கலைக்கழக மாணவிக்குப் பாலியல் வன்கொடுமை

சென்னையில் அதிர்ச்சி; எதிர்க்கட்சிகள், மாணவர்கள் போராட்டம்

சென்னை கிண்டியில் உள்ள அண்ணா பல்கலைக்கழக வளாகத்தில் டிசம்பர் 21ஆம் தேதி பொறியியல் துறை மாணவி ஒருவரை இருவர் சேர்ந்து கூட்டுப் பாலியல் வன்கொடுமைக்கு ஆளாக்கிய சம்பவம் தமிழகத்தில் கடும் அதிர்ச்சியையும் பரபரப்பையும் ஏற்படுத்தியுள்ளது.

மாணவி கொடுத்த புகாரின் பேரில், கோட்டூர்புரம் அனைத்து மகளிர் காவல்துறை ஆய்வாளர் பத்மாவதி தலைமையில், நான்கு சட்டப்பிரிவுகளின் கீழ் வழக்குபதிவு செய்து குற்றவாளியை மூன்று தனிப்படைகள் அமைத்து வலைவீசித் தேடியதில், 37 வயது ஞானசேகரன் என்பவனைக் கைது செய்தனர். அவன், கோட்டூர்புரம் மண்டபம் சாலையோரத்தில் பிரியாணிக் கடை நடத்தி வருவது விசாரணையில் தெரியவந்துள்ளது.

அவரை 15 நாள்கள் (ஜனவரி 8ஆம் தேதி வரை) நீதிமன்றக் காவலில் வைத்து விசாரிக்குமாறு சைதாப்பேட்டை நீதிமன்றம் உத்தரவிட்டுள்ளது.

மாணவி பாலியல் வன்கொடுமைக்கு ஆளாக்கப்பட்ட சம்பவத்தைக் கண்டித்து அரசியல் கட்சிகளும் மாணவர்களும் போராட்டத்தில் ஈடுபட்டு வருகின்றனர்.