சுற்றுலாப் பயணிகளுக்கும் காவலர்களுக்கும் மோதல்: மூன்று காவலர்கள் இடைநீக்கம்

மேட்டூர் அருகே உத்தரப் பிரதேச சுற்றுலாப் பயணிகளுக்கும் காவலர்களுக்கும் இடையே ஏற்பட்ட மோதல் சம்பவம் தொடர்பாக மூன்று காவலர்கள் இடைநீக்கம் செய்யப்பட்டுள்ளனர்.

உத்தரப் பிரதேச மாநிலம் பிரயாக்ராஜ் மாவட்டத்தைச் சேர்ந்த 43 பேர் சொகுசுப் பேருந்தில் 35 நாள்கள் ஆன்மீகச் சுற்றுலா வந்தனர். தமிழகத்தில் காஞ்சி, ஸ்ரீரங்கம், ராமேசுவரம், கன்னியாகுமரி, மதுரை ஆகிய இடங்களைப் பார்வையிட்டனர்.

பின்னர், கர்நாடக மாநிலம் மாதேஸ்வரன் மலைக்கு தமிழக எல்லையான மேட்டூர் காரைக்காடு சோதனைச் சாவடி வழியாக டிசம்பர் 27ஆம் தேதி வெள்ளிக்கிழமையன்று சென்றனர். அப்போது காரைக்காடு மதுவிலக்கு சோதனைச் சாவடியில் காவலர்கள் சொகுசுப் பேருந்தை நிறுத்தி சோதனையில் ஈடுபட்டனர்.