శిష్యుడిగా చేరాలనుంది..

శిష్యుడిగా చేరాలనుంది..

- యామిజాల జగదీశ్

ఓ రోజు ఒకడొచ్చాడు.

“సార్, ఓ గురువు దగ్గర శిష్యుడిగా చేరాలనుంది. మీకు తెలిసినవారెవరైనా ఉంటే చెప్పండి" అన్నాడు.

అతని మాటలు వింటుంటే గురువనేవాడు ఎక్కడో సంతలో వస్తువనుకున్నాడనిపించింది. గురువంటే డబ్బులు పెట్టి కొనుగోలు చేసే వస్తువు అనుకున్నట్టున్నాడు.

నేనేదో ఈ విషయంలో అతనికి ఓ ఏజంట్ అన్నట్టుగా భావించాడేమో అనిపించింది. పదే పదే ఓ గురువుంటే చెప్పండి.. అని అంటుంటే. అప్పుడు నేనేం చేశానంటే వెంటనే నేను అతనిని నా ఎదుట కూర్చోబెట్టుకుని కాస్సేపటి వరకు నేను గురువుగా మారాను.

ఇలా నేనొక్కడినే కాదు, మన జీవితంలో ప్రతి ఒక్కరం ఏదో సందర్భంలో గురువవుతుంటాం.ఇందులో మన ప్రమేయం ఉండదు.

ఒక గురువు దగ్గర శిష్యుడిగా చేరడం ఎలా? అనే ప్రశ్నకు స్వామి శివానంద జీవితంలో జరిగిన కొన్ని సంఘటనలు చెప్పాను, ఆ మాటలు అతను నమ్ముతాడని.

హిమాలయ పర్వతశ్రేణి కింద ఋషికేశ్వరం ఉంది. అక్కడ స్వామి శివానంద ఉండేవారు. ఆయన ఓ ఆశ్రమం కూడా స్థాపించారు. దాని పేరు శివానందాశ్రమం. ఆయన వద్ద శిష్యరికం కోసం ఎక్కడెక్కడి నుంచో ఎందరెందరో వచ్చారు.