నీతులు మాకేనా?

ఒక ప్రముఖ గురువు ప్రవచనాలు బోధించ డానికి జ్ఞానాపురానికి వచ్చాడు.

-  షేక్ అబ్దుల్ హకీం జాని -

ఒక ప్రముఖ గురువు ప్రవచనాలు బోధించ డానికి జ్ఞానాపురానికి వచ్చాడు. ఏ ఊరుకు వెళ్లినా గురువుకు ప్రజలు బ్రహ్మరథం పట్టేవారు. దాంతో ప్రవచనాలు బోధించడంలో తనను మించిన జ్ఞాని ఈ భూప్రపంచంలో లేడనే గర్వం గురువు మనసులో పెరిగిపోయింది. గర్వానికి దూరంగా ఉండే జ్ఞానాపురం ప్రజలు చాలా సౌమ్యలు. ఒకరినొకరు ఆప్యాయంగా పలకరించుకుంటూ సయోధ్యగా ఉంటారు. 'కోపం మనల్ని దహించివేస్తుంది' అనే అంశంపై గురువు ఆరోజు ఉపన్యసించారు. ''మిత్రులారా! మీరు కోపాన్ని దరి చేరనీయకండి. తన కోపమే తనకు శత్రువు అన్నారు పెద్దలు.విపరీతమైన కోపం వస్తే ఏదిమంచి? ఏది చెడు అని తెలుసుకునే విచక్షణాజ్ఞానాన్ని కోల్పోతాము. కోపాన్ని వదిలేస్తే జీవితం పూలవనం అవుతుంది' అని గురువు అనర్గళంగా తన ప్రవచనాలలో చెప్పాడు.