విద్యాపథం

“విద్యా దదాతి వినయం" అనేది ఆర్యోక్తి.

- అయినంపూడి వెంకట నారాయణ

విద్య వినయాన్ని చేకూరుస్తుంది. విద్య పరిపూర్ణం కావాలంటే సాధారణంగా చదివితే సరిపోదు. దానికి అసాధారణమైన కృషి, పట్టుదల మెండుగా ఉండాలి. ముందుగా విద్యార్థిలో సరైన దృక్పథం ఉండాలి. లక్ష్యాన్ని సలక్షణంగా నిర్ణయించుకోవాలి.

అందుకే “దృష్టిని బట్టి సృష్టి గోచరిస్తుంది" అని మన పెద్దలంటారు.దృక్పథం పట్ల స్పష్టత ఉన్న విద్యార్థి ఏ రంగంలో అయినా తరంగంలా విజృంభిస్తాడు.

విద్యార్థికి దృక్పథంతో పాటు సరైన వాక్కు ఉండాలి. ఆ వాక్కు మనిషికి నిజమైన అలంకారం. "నోరు మంచిదైతే ఊరు మంచిదవుతుంది" కదా. మనిషికి వాక్సుద్ధి ఉంటే వాక్సిద్ధి ఉంటుంది.