ஸ்ரீராமகிருஷ்ணர் யாரோ!

'மனித உருவில் நான் தோன்றும் போது, எனது மாறுபாடு இல்லாத, அனைத்திற்கும் மேற்பட்ட பரமார்த்த சொரூபத்தை மக்கள் அறிவதில்லை' என்பது கீதையிலுள்ள (7.24) ஒரு சுலோகத்தின் மையக்கருத்து.

சாதாரண மனிதரைப் போல அவதரிக்கும் பரம்பொருளாகிய கடவுளை உண்மையில் அவர் யார் என்பதை எல்லோராலும் அறிய முடியாது. ஆயினும் இவர் 'மனித வடிவில் வந்துள்ள பரம்பொருளே' என்பதை அவர் வாழும்போது அவர் அருள் பெற்ற ஒரு சில பக்தர்களே அறிகின்றனர். இங்கு ஸ்ரீராமகிருஷ்ணரை அவரது வரலாற்று நூல்களின் ஆதாரத்தைக் கொண்டு பல்வேறு நிலைகளில் தியானித்து மகிழலாம்.

பக்தர் ஸ்ரீராமகிருஷ்ணர்

பக்தர் என்றதும் நம் நினைவிற்கு வருபவர்கள் பிரஹலாதன், துருவன், மீராபாய் போன்றோர் ஆவர். மீராபாய் எவ்வாறு கண்ணனை நினைத்துப் பாடிக்கொண்டே இருப்பாரோ அதே போல் ஸ்ரீராமகிருஷ்ணரும் காளி, கண்ணன், சிவன் எனப்பல தெய்வங்களை நினைத்தவாறு பாடல்களைப் பாடிக்கொண்டே இருப்பார். பக்த பிரஹலாதன் போல எப்போதும் நாம ஜபம் செய்தல், நாமாவளி பாடுதல் என ஓதிக் கொண்டே இருப்பார்.