ആറാടാൻ കാനറികൾ

ഖത്തറിലെത്തുന്ന ബ്രസീൽ സ്ക്വാഡി ന്റെ കരുത്തിനെക്കുറിച്ച് ആർക്കും സംശയമില്ല. ആ കരുത്തിനെ നന്നായി വിനിയോഗിക്കാൻ കഴിയുന്ന ടിറ്റെയുടെ കീഴിൽ ആറാം ലോകകിരീടം ആരാധകർ സ്വപ്നം കാണുന്നു

- ഷാമിൽ അനു

സൂര്യനുദിക്കുന്നതു പോലെ, പൂ വിരിയുന്നതുപോലെ സ്വാഭാവികമായി നടക്കുന്ന ചില കാര്യങ്ങളുണ്ട്. ഫുട്ബോളിലാണെങ്കിൽ അത് ബ്രസീൽ ലോകകപ്പിൽ പങ്കെടുക്കുന്നതു പോലെ എന്നുപറയേണ്ടിവരും. ചരിത്രത്തിൽ ഇതുവരെ ഒരു പ്ലേഓഫ് പോലും കളിക്കാതെ എല്ലാ ലോകകപ്പിനും യോഗ്യത നേടിയിട്ടുള്ള ഏക ടീമാണ് കാനറികൾ. നാല് വ്യത്യസ്ത ഭൂഖണ്ഡങ്ങളിൽ നിന്നായി അഞ്ച് കനക കിരീടങ്ങൾ റിയോയിലെ ബ്രസീലിന്റെ ഫുട്ബോൾ ആസ്ഥാനത്ത് ഭദ്രമായി ഇരിപ്പുണ്ട്.

1950-ലെ മാറക്കാനാ ദുരന്തത്തിനു ശേഷമാണ് ബ്രസീലിയൻ ഫുട്ബോളിൽ ഉയിർത്തെഴുന്നേൽപ്പിന്റെ കാഹളം മുഴങ്ങുന്നത്. ബ്രസീലിന്റെ അപാരമായ തിരിച്ചുവരവാണ് പിന്നീടങ്ങോട്ട് കണ്ടത്. ആദ്യം അവർ തങ്ങളുടെ തൂവെള്ള ജേഴ്സി മാറ്റി, മഞ്ഞ ജേഴ്സിയും നീല ഷോർട്ട്സും കൊണ്ടുവന്നു. കോച്ചിങ് രീതികളും സ്വതസ്സിദ്ധമായ ജിങ്ക സ്റ്റൈലും പുനരുജ്ജീവിപ്പിച്ച് ബ്രസീൽ ഫുട്ബോൾ ഫെഡറേഷൻ വലിയൊരു ക്യാമ്പയിന് തുടക്കമിട്ടു. അങ്ങനെയാണ് അവർ 1958-ൽ സ്വീഡനിലും 1962-ൽ ചിലിയിലും 1970-ൽ മെക്സിക്കോയിലും കിരീടം ചൂടിയത്. 1958-70ലെ പെലെ, ദിദി, കാർലോസ് ആൽബർട്ടോ, ജഴ്സിഞ്ഞോ, ഗാരിഞ്ച തുടങ്ങിയവർ നയിച്ച സുവർണ കാലഘട്ടത്തിനു ശേഷം ബ്രസീൽ വീണ്ടും സുശക്തമാവുന്നത് തൊണ്ണൂറുകളുടെ തുടക്കത്തിലാണ്.

1994-ലും 2002-ലും ലോക ചാമ്പ്യന്മാരായി ബ്രസീൽ തങ്ങളുടെ അപ്രമാദിത്വം ഊട്ടിയുറപ്പിച്ചു. അന്നുവരെ ബ്രസീലിന് കൈമോശം വരാത്തതും എതി രാളികൾ ഭയപ്പെട്ടിരുന്നതും മനോഹരമായ ഫുട്ബോൾ എന്നറിയപ്പെടുന്ന ജിങ്ക സ്റ്റൈലായിരുന്നു. വളർന്നുവരുന്ന ഓരോ ബ്രസീൽ കളിക്കാരനിലും ഇന്നും കാണപ്പെടുന്ന വഴക്കവും കൂസലില്ലായ്മയുമൊക്കെ ജോഗോ ബൊണീറ്റോയുടെ തിരുശേഷിപ്പുകളാണ്.

കാലം മാറിയതോടെ അവരുടെ കളിരീ തിയിലും മാറ്റം വന്നു. ബ്രസീലിലെ പ്രതിഭകളെ ചെറുപ്രായത്തിൽ യൂറോപ്പിലെ എലൈറ്റ് ടീമുകൾ സൈൻ ചെയ്തുതുടങ്ങിയതോടെയാണ് ഇതിന് വേഗം കൂടിയത്. 2018 ലോകകപ്പിൽ ബ്രസീൽ സ്ക്വാഡിലെ എല്ലാ മുൻനിര കളിക്കാരും യൂറോപ്പിലെ എലൈറ്റ് ക്ലബ്ബുകളിലെ പതിവുകാരായിരുന്നു. അതുകൊണ്ടുതന്നെ ആ ടീമിന് യൂറോപ്പിലെ ഏത് വമ്പന്മാരോടും കൊരുക്കാനുള്ള ശേഷിയുമുണ്ടായിരുന്നു. ക്വാർട്ടറിൽ ബെൽജിയത്തോട് അവസാനനിമിഷംവരെ പൊരുതിയാണ് ബ്രസീൽ പുറത്താവുന്നത്. ആ കളി കണ്ടവരാരും ബ്രസീലിയൻ സ്ക്വാഡിന്റെ സാങ്കേതികതയെ സംശയിക്കുകയില്ല.