ആരാണ് സന്തോഷം ആഗ്രഹിക്കുന്നത്.....?

ആദ്യമായി ഇന്ത്യയ്ക്ക് പുറത്ത് സന്തോഷ് ട്രോഫി മത്സരങ്ങൾ കളിക്കുക എന്ന സ്വപ്നമാണ് കേരള താരങ്ങൾക്ക് നഷ്ടമായിരിക്കുന്നത്. ഒഡിഷയിൽ നടന്ന ഫൈനൽ റൗണ്ടിൽ തീർത്തും മോശം പ്രകടനമായിരുന്നു കേരളം കാഴ്ചവെച്ചത്

- അനീഷ് പി. നായർ

സന്തോഷ് ട്രോഫിക്ക് വർഷങ്ങളായി അഖിലേന്ത്യ ഫുട്ബോൾ ഫെഡറേഷൻ കാര്യമായി പ്രധാന്യം നൽകിയിരുന്നില്ല. കേരളത്തിലും കൊൽക്കത്തയിലുമൊക്കെ നടക്കുമ്പോൾ മാത്രമെ ടൂർണമെന്റിന് പ്രധാന്യം ലഭിച്ചിരുന്നുന്നുളളു. ഇന്ത്യൻ സൂപ്പർ ലീഗിന്റേയും ഐ ലീഗിന്റേയും ഇടയിൽപ്പെട്ട് ഞെരിഞ്ഞമർന്ന സന്തോഷ് ട്രോഫി അൽപ്പം ജീവൻ വെച്ചത് കഴിഞ്ഞ വർഷം മഞ്ചേരിയിൽ നടന്നപ്പോഴാണ്. അവിടുത്തെ ജനപങ്കാളിത്തം ഫെഡറേഷനെ ഞെട്ടിച്ചു. കപ്പുയർത്തി കേരളം ആരാധകരെ തൃപ്തിപ്പെടുത്തുകയും ചെയ്തു. മഞ്ചേരിയിൽ നിന്ന് ഒഡിഷയിലെ ഭുവനേശ്വറിലേക്ക് എത്തുമ്പോൾ കാര്യങ്ങൾ തലകീഴായി മാറിഞ്ഞു. പ്രകടനത്തിൽ കേരളം ശരാശരിക്ക് താഴെ പോകുന്നു. കാണികളുടെ കാര്യത്തിൽ ഒന്നും പറയുകയും വേണ്ട. ഭുവനേശ്വറിലെ മൂന്ന് വേദികളിലും കാണികളുടെ പൊടിപോലുമില്ല. ആകെ ആശ്വാസം ഫൈനൽ റൗണ്ട് മത്സരങ്ങളുടെ സംഘാടനം മാത്രം.

മുൻവർഷത്തെ ചാമ്പ്യൻമാരായ കേരളം സെമിഫൈനൽ കടക്കാതെ പുറത്തായതും ചരിത്രത്തിൽ ഏറ്റവും കൂടുതൽ കിരീടം നേടിയ ബംഗാൾ ഒറ്റവിജയം പോലും നേടാൻ കഴിയാതെ മടങ്ങിയതുമാണ് ഫൈനൽ റൗണ്ടിലെ വലിയ വാർത്തകൾ.

റിയാദിലെ സെമി

അഖിലേന്ത്യ ഫുട്ബോൾ ഫെഡറേഷന്റെ തലപ്പത്ത് മുൻ ഇന്ത്യൻ താരം കല്യാൺ ചൗബേയും മലയാളിയായ ഷാജി പ്രഭാകരനും വന്നതോടെ ചില ഗുണപരമായ മാറ്റങ്ങളുണ്ട്. അതിലൊന്ന് സന്തോഷ് ട്രോഫിയെ ഉയർത്തിയെടുക്കാനുള്ള ശ്രമമാണ്. അതിന്റെ ഭാഗമായിട്ടാണ് സെമിയും ഫൈനലും സൗദി അറേബ്യയിലെ റിയാദിൽ നടത്താൻ തീരുമാനിച്ചത്.

കളിക്കാർക്ക് പ്രോത്സാഹനം എന്ന നിലയിലാണ് ഈ തീരുമാനം കൈകൊണ്ടത്. ഇതിന് പുറമെ ടീമുകളുടേയും കളിയുടേയും നിലവാരം ഉയർത്താൻ ടൂർണമെന്റിന്റെ ഘടന മാറ്റി. മേഖല മത്സരങ്ങൾ മാറ്റി. ആദ്യം യോഗ്യത റൗണ്ടും പിന്നെ ഫൈനൽ റൗണ്ടും അതിന് ശേഷം സെമി ഫൈനൽ എന്ന രീതിയിലേക്ക് കാര്യങ്ങൾ മാറ്റി. ടീമിൽ നാല് ജൂനിയർ താരങ്ങളെന്ന ചട്ടവും മാറ്റി.

കേരളമില്ലാതെ സെമിഫൈനൽ

റിയാദിലെ കിങ് ഫഹദ് സ്റ്റേഡിയത്തിൽ സന്തോഷ് ട്രോഫിയുടെ സെമി നടക്കുമ്പോൾ ആളെകൂട്ടാൻ പറ്റുന്ന ഏക ടീം കേരളമായിരുന്നു. കേരളം കളിച്ചാൽ മലയാളികൾ കളി കാണാനെത്തുമെന്നുറപ്പായിരുന്നു. എന്നാൽ നിരാശാജനകമായ പ്രകടനത്തോടെ കേരളം ഫൈനൽ റൗണ്ടിൽ പുറത്തായി.