ഗോൾഡൻകുലം

ഐ ലീഗ് ഫുട്ബോൾ കിരീടം നിലനിർത്തി ഗോകുലം കേരള എഫ്.സി. പുരുഷ-വനിതാ ടീമുകൾ ചരിത്രം തീർത്തിരിക്കുന്നു. കേരള ഫുട്ബോൾ അതിന്റെ ഏറ്റവും പ്രതാപകാലത്തിലൂടെയാണ് ഇപ്പോൾ കടന്നുപോകുന്നത്

- അനീഷ് പി. നായർ

 കേരള ഫുട്ബോൾ പ്രതാപം തിരിച്ചുപിടിക്കുമ്പോൾ ഗോകുലം കേരള എഫ്.സി.ക്ക് എങ്ങനെ ഐ ലീഗ് കിരീടം ഇല്ലാതെ കൊൽക്കത്തയിൽ നിന്ന് മടങ്ങാൻ കഴിയും.അത്തരമൊരു ചോദ്യം മുഹമ്മദൻ സിനെതിരായ നിർണായക കളിക്കുമുമ്പ് കളിക്കാരു ടെയും പരിശീലകന്റെയും മനസ്സുകളിലാണ് കൂടുതൽ ചോദിക്കപ്പെട്ടത്. സാൾക്ക് സ്റ്റേഡിയത്തിൽ കൊൽക്കത്ത ക്ലബ്ബിന്റെ വിജയത്തിനായി ആർത്തു വിളിച്ച ആയിരങ്ങളുടെ നടുവിലാണ് താത്കാലിക നായകൻ അമിനോ ബൗബയ്ക്കു കീഴിൽ ഗോകുലം ജയവും ഒപ്പം കിരീടവും പിടിച്ചെടുത്തത്.

ലീഗ് ചരിത്രത്തിൽ കിരീടം നിലനിർത്തുന്ന ആദ്യ ടീമെന്ന ഖ്യാതിയോടെയാണ് ഗോകുലം ഇത്തവണ കപ്പിൽ മുത്തമിട്ടത്. പിറന്നുവീണ് അഞ്ചുവർഷത്തിനുള്ളിൽ ഏഴു കിരീടങ്ങളാണ് കോഴിക്കോട് കോർപ്പറേഷൻ സ്റ്റേഡിയത്തിലുള്ള ഗോകുലത്തിന്റെ ക്ലബ്ബ് ഓഫീസിലേക്കെത്തിയത്. ഒപ്പം വനിതാ ലീഗ് കിരീടവും അവിടെ കാണാം. ഇന്ത്യൻ ഫുട്ബോളിലെ വമ്പൻ പേരുകാരായ ക്ലബ്ബുകൾക്ക് സാധിക്കാത്ത നേട്ടമാണ് കിരീടം നിലനിർത്തുന്നതിലൂടെ ഗോകുലം നേടിയെടുത്തത്. ലീഗിൽ തോൽവിയറിയാതെ 21 മത്സരം പിന്നിട്ട് പുതിയൊരു റെക്കോഡും ടീം എഴുതിച്ചേർത്തിട്ടുണ്ട്.

ത്രില്ലർ ക്ലൈമാക്സ്

ലീഗിലെ 16-ാം റൗണ്ട് മത്സരം പൂർത്തിയായപ്പോൾ ഗോകുലത്തിന് കിരീടത്തിലേക്കെത്താൻ വേണ്ടത് ഒരു പോയന്റ് മാത്രം. മുൻ സീസണിൽ തുടങ്ങിയ അപരാജിതകുതിപ്പിന്റെ റെക്കോഡും കൂട്ടിനുണ്ട്. എന്നാൽ 17-ാം റൗണ്ടിൽ കാര്യങ്ങൾ മാറിമറിഞ്ഞു. ശ്രീനിധി ക്ലബ്ബിനോട് വഴങ്ങിയ അപ്രതീക്ഷിത തോൽവി ടീമിന്റെ സാധ്യതകളെ സാരമായി ബാധിച്ചു. രാജസ്ഥാൻ എഫ്.സി.യെ തോൽപ്പിച്ച് മുഹമ്മദൻസ്, ഗോകുലവുമായുള്ള അകലം കുറയ്ക്കുകയും ചെയ്തു. ശ്രീനിധിക്കെതിരായ കളിയിൽ തോൽവിക്കൊപ്പം നായകൻ ഷെരീഫ് മുഹമ്മദ് ചുവപ്പുകാർഡ് കണ്ടതും മികച്ച രീതിയിൽ കളിക്കുന്ന എം.എസ്. ജിതിന് മഞ്ഞ കാർഡ് ലഭിച്ചതും ടീമിന് കനത്ത തിരിച്ചടിയായി. ലീഗിൽ നാലാം മഞ്ഞ കാർഡ് കണ്ടതോടെ ജിതിനും അടുത്ത മത്സരത്തിൽ കളിക്കാൻ സാധിക്കില്ലെന്ന അവസ്ഥ.