ടെന്നീസിലെ യുഗാന്ത്യം

ടെന്നീസ് ലോകം കണ്ട രണ്ട് ഇതിഹാസ താരങ്ങളാണ് കഴിഞ്ഞ മാസം കളി അവസാനിപ്പിച്ചത്. പുരുഷ താരം റോജർ ഫെഡററും വനിതാ താരം സെറീന വില്യംസും. ഇരുവരും പടിയിറങ്ങുമ്പോൾ ടെന്നീസിൽ അതൊരു യുഗാന്ത്യം കൂടിയാണ്

- എസ്. രാംകുമാർ

വന്നു, കളിച്ചു കീഴടക്കിപോകുന്നവർ പലരുണ്ട്. പക്ഷേ പോകുമ്പോൾ കാഴ്ചക്കാരുടെയും അതുവരെ പ്രതിയോഗികളായിരുന്നവരുടെയും കണ്ണിൽ നഷ്ടബോധത്തിന്റെ നീരുനിറക്കുന്നവരാണ് ഇതിഹാസങ്ങളെന്ന് വാഴ്ത്തപ്പെടുക. പോയ മാസം ടെന്നിസ് കോർട്ട് നിറവിന്റെ നൊമ്പരം രണ്ടുവട്ടമറഞ്ഞു. ആദ്യം സെറീന, പിന്നെ ഫെഡറർ.

വിരമിക്കൽ എന്ന പദം ഒഴിവാക്കാൻ സെറീന ശ്രദ്ധിച്ചു. ഞാൻ ടെന്നിസിൽ നിന്ന് പരിണമിക്കുന്നുവെന്നാണ് അവർ വിശദീകരിച്ചത്. മാഞ്ഞു പോകുന്നില്ല, ടെന്നിസിന്റെ പരിസരത്ത് മറ്റൊരു വേഷത്തിൽ ഉണ്ടാകുമെന്ന് ഫെഡറർ ആരാധകരെ ആശ്വസിപ്പിച്ചു. പുതിയ താരങ്ങൾ രൂപംകൊള്ളും, റെക്കോഡുകൾ പഴങ്കഥകളാകും. പക്ഷേ കാലം തിരിച്ചുവരില്ലല്ലോ. 

സെറീനയെന്നാൽ ആത്മാഭിമാനം

1995-ല്‍ പതിന്നാലാമത്തെ വയസ്സിലാണ്‌ സെറീന വില്യംസ്‌ പ്രൊഫഷണല്‍ ടെന്നിസില്‍ അരങ്ങേറിയത്‌. 2022-ല്‍ 41-0൦ വയസില്‍ അവസാന മത്സരം. 1999-ലാണ്‌ ആദ്യ ഗ്രാന്‍ഡ്സ്ലാം ജയം. 1958-ല്‍ ആല്‍തെ ജിബ്സണണ്‍ ശേഷം നേട്ടം സ്വന്തമാക്കിയ ആദ്യ ആഫ്രോ-അമേരിക്കന്‍ അന്ന്‌ യു.എസ്‌. ഓപ്പണിലേക്കുള്ള സെറീനയുടെ പ്രയാണം ലോക നാലാം റാങ്കുകാരിയായ മോണിക്ക സെലെസ്‌, രണ്ടാം റാങ്കുകാരിയായ ലിന്‍ഡ്്‌സേ ഡാവെന്‍പോര്‍ട്ട്‌, ഒന്നാം റാങ്കുകാരിയായ മാര്‍ട്ടിന ഹിന്‍ജിസ്‌ എന്നിവരെ അട്ടിമറിച്ചു കൊണ്ടായിരുന്നു. പുതിയൊരു യുഗത്തിന്‌ തുടക്കമായി.

പിന്നീടങ്ങോട്‌ സ്വന്തം സഹോദരി വീനസ്‌ വില്യംസ്‌, മരിയോ ഷറപ്പോവ തുടങ്ങി അപൂര്‍വം ചില വെല്ലുവിളികള്‍ ഒഴിച്ചാല്‍ ഏറെക്കുറെ ഏകപക്ഷീയമായ തേര്‍വാഴ്ചയായിരുന്നു സെറീനയുടേത്‌. ശാരീരികമായ അസൌകര്യങ്ങളുടെ പേരില്‍ പിന്നോട്ട്‌ പോകേണ്ടി വന്നപ്പോഴൊക്കെയും പൂര്‍വാധികം ശക്തിയോടെ അവര്‍ തിരിച്ചെത്തി. 2007-ലെ ഓസ്ട്രേലിയന്‍ ഓപ്പണ്‍, ഒന്നാം റാങ്കുകാരിയായ ഷറപ്പോവയ്ക്കു തന്നെ കിരീടമെന്ന്‌ എല്ലാവരും ഉറപ്പിച്ചിരുന്നു. 81-0൦ റാങ്കിലായിരുന്നു പലരും എഴുതിതള്ളിയ സെറീന. പക്ഷേ മാസ്മരികമായ തിരിച്ചുവരവിന്റെ അസാധാരണ അനുഭവത്തിനാണ്‌ അന്ന്‌ മെല്‍ബണ്‍ വേദിയായത്‌.