കാൽപന്തിന്റെ അറബിക്കഥ

അറബിക്കഥകളെ വെല്ലുന്ന മായക്കാഴ്ചകളുമായി ലോകകപ്പ് ആഘോഷമാക്കുകയാണ് ഖത്തർ.' മാതൃഭൂമി'ക്കായി ഖത്തർ ലോകകപ്പ് റിപ്പോർട്ട് ചെയ്യുന്ന സിറാജ് കാസിം എഴുതുന്നു

എല്ലാവരാലും ഒറ്റു കൊടുക്കപ്പെട്ട് രണ്ടു കൈകളും വിടർത്തി ഗോൾവലയത്തിനു മുന്നിൽ ലോകത്തിലെ ഏറ്റവും ഏകാകിയായ മനുഷ്യനായി അയാൾ. തൊണ്ടയിൽ ശബ്ദം കുരുങ്ങി ഗ്യാലറിയിൽ നിശ്ശബ്ദരായിരിക്കുന്ന പതിനായിരക്കണക്കിനു കാണികൾ. അവിടെ താണ്ഡവത്തിനു മുമ്പ് ജടയഴിച്ചിട്ട ശിവനെപ്പോലെ ചുരുണ്ട മുടിക്കാരനായ ഹിഗ്വിറ്റ...

ഗോൾ പോസ്റ്റിനു മുന്നിൽ അചഞ്ചലനായി നിന്നു വല കാക്കുന്ന നക്ഷത്രമായി ഹിഗ്വിറ്റ എന്ന കൊളംബിയൻ ഗോളിയെ മലയാളത്തിന്റെ പ്രിയ എഴുത്തു കാരൻ എൻ.എസ്. മാധവൻ വാക്കുകളിൽ വരച്ചിടുന്നത് അങ്ങനെയാണ്. വാഴ്ത്തപ്പെട്ട നക്ഷത്രമായി ഹിഗ്വിറ്റയെ നെഞ്ചേറ്റിയ അതേ ജനത തന്നെയാണ് എസ്കോബാറിനെ ഒരു ചോരപ്പൂവായി വരച്ചിട്ടതും. സെൽഫ് ഗോളിന്റെ വിലയായി എസ്കോബാർ എന്ന നക്ഷത്രം നിറതോക്കിന്റെ മുന്നിൽ ചോര വായി ചിതറിയപ്പോൾ ലോകത്തിന്റെ തൊണ്ടയിൽ സങ്കടത്തോടെ അതുവരെയുള്ള എല്ലാ ആരവങ്ങളും കുരുങ്ങിക്കിടന്നു.

ഖത്തറിന്റെ മണ്ണിലേക്കു പറക്കുന്ന നേരത്തു വിമാനത്തിന്റെ ജാലകത്തിലൂടെ പുറത്തേക്കു നോക്കുമ്പോൾ മുന്നിൽ തെളിഞ്ഞ വെൺമേഘക്കെട്ടുകൾ ഹിഗ്വിറ്റയുടെയും എസ്കോബാറിന്റെയും കഥകൾ ഓർമ്മിപ്പിച്ചത് എന്തിനാണെന്നു എനിക്കറിയില്ല. ആയിരത്തൊന്ന രാവുകളിലെ കഥ പോലെ വിസ്മയങ്ങളുടെ മണിച്ചെപ്പുമായി കാത്തിരിക്കുന്ന ഖത്തറിന്റെ മൈതാനങ്ങളിലും വാഴ്ത്തപ്പെട്ടവരും കുരിശിലേറ്റപ്പെട്ടവരും പിറക്കുമെന്നത് ഉറപ്പ്. അതു കാൽപന്തുകളിയുള്ളിടത്തോളം കാലം ആവർത്തിക്കപ്പെടുന്ന നിയോഗവും വിധിയും തന്നെയാണ്. ഖത്തറിന്റെ ഭൂമികയിൽ ലയണൽ മെസ്സിയും ക്രിസ്റ്റ്യാനോ റൊണാൾഡോയും നെയ്മറും അടക്കമുള്ള നക്ഷത്രങ്ങൾ കൺമുന്നിൽ തെളിയാനിരിക്കുന്നുവെന്ന യാഥാർത്ഥ്യം ഓർത്തപ്പോൾ മനസിൽ എന്തെന്നില്ലാത്ത ഒരു ആനന്ദം  വന്നു നിറഞ്ഞു. ഈ നക്ഷത്രങ്ങൾക്കു ഭൂമിയിലെ ഏറ്റവും വലിയ പ്രകാശം പ്രസരിപ്പിക്കാൻ അറബിക്കഥയിലെ അദ്ഭുതവിളക്കുള്ള അലാവുദ്ദീൻ അവരെ അനുഗ്രഹിക്കുമോ? അതോ പറക്കും തളിക സ്വന്തമാക്കിയ അദ്ഭുത നായകനെപ്പോലെ അതുവരെ ചിത്രത്തിലില്ലാതിരുന്ന ആരെങ്കിലുമൊക്കെ പ്രത്യക്ഷപ്പെടുമോ? ചോദ്യങ്ങൾ മനസിൽ കടൽ പോലെ ഇരമ്പുന്ന നേരത്ത് വിമാനം ദോഹയുടെ മണ്ണിൽ തൊട്ടു.

സ്വപ്നങ്ങളുടെ ഭൂമികയിൽ