ഡീഗോ എന്ന സാമ്രാജ്യം

ഫുട്ബോളിന്റെ സമസ്ത സൗന്ദര്യവും പ്രകടിപ്പിച്ചു കൊണ്ട് മാറഡോണ മൈതാനങ്ങളിൽ വിജയത്തിന്റെയും പരാജയത്തിന്റെയും നടുക്കങ്ങളുടെയും തിരയിളക്കങ്ങൾ സൃഷ്ടിച്ചു

- പി.ടി. ബേബി

സഞ്ചാരത്തിനാണ് മനുഷ്യർ കാലുകൾ ഉപയോഗിക്കുന്നത്. നിസ്സാരമായ ഒരു ജന്മത്തിനിടെ അവന് എത്രയോ പടവുകൾ കയറാനിരിക്കുന്നു, അതിലേറെ പടവുകൾ ഇറങ്ങാനിരിക്കുന്നു. ആ കാലുകളിൽ സർഗാത്മകതയുണ്ടെന്ന് ആരാണ് ആദ്യം കണ്ടെത്തിയത്? അവനാണ് ഫുട്ബോൾ എന്ന കളി കണ്ടുപിടിച്ചത്. ഗോൾവര കടന്ന് വലയിലെത്തുക എന്നതാണ് ഒരു പന്തിന്റെ സാഫല്യം. അവധാനതയോടെ നെഞ്ചിൽ സ്വീകരിച്ച്, വിദഗ്ധമായ് ഡ്രിബിൾ ചെയ്ത്, കണിശമായ പാസുകൾ നൽകി, കൃത്യതയോടെ തന്നെ വലയിലെത്തിക്കുന്നവരെ പന്ത് സ്നേഹിക്കുന്നു. പന്തിനെ സ്നേഹിക്കുന്നവരെ ലോകം നെഞ്ചിലേറ്റുന്നു. ഡീഗോ മാറഡോണയുടെ ഐതിഹാസിക ജീവിതം ലോകത്തിന് അർഥവത്താകുന്നത് ഇവിടെയാണ്. കൺനിറയെ കാഴ്ചകൾ തന്ന ഡീഗോയ്ക്ക് നമ്മൾ കരൾനിറയെ സ്നേഹം നൽകി. കാത് നിറയെ ആരവങ്ങളുയർത്തിയ താരത്തെ മനസ്സുനിറഞ്ഞ് ആരാധിച്ചു. ഹൃദയപുഷ്പങ്ങളാൽ അർച്ചന നൽകി, ഹർഷബാഷ്പങ്ങളാൽ പ്രാർഥനയേകി.

മനുഷ്യൻ ഭൂമിയിൽ ജീവിച്ച ലക്ഷക്കണക്കിന് വർഷങ്ങളുടെ കണക്കെടുത്താൽ അവരിലെ എണ്ണപ്പെട്ട പേരാണ് ഡീഗോ മാറഡോണ. വരാനിരിക്കുന്ന തലമുറക്കൊന്നിനും ആ പേരിനൊപ്പം ജീവിക്കാതിരിക്കാനാവില്ല. അങ്ങനെ അപൂർവം മനുഷ്യരേ ഭൂമിയിലുണ്ടായിട്ടുള്ളൂ. മഹാത്മാ ഗാന്ധി, നെൽസൺ മണ്ടേല, എബ്രഹാം ലിങ്കൺ, ആൽബർട്ട് ഐൻസ്റ്റൈൻ, ബീഥോവൻ, വില്യം ഷേക്സ്പിയർ...അങ്ങനെ ചുരുക്കം. ഫുട്ബോളിൽ നിന്നുള്ള രണ്ട് പേരുകൾ ആ പട്ടികയിൽ വേറിട്ടുനിൽക്കും. അവർ പെലെയും മാറഡോണയുമാണ്.

ബി.സി. നാലാം നൂറ്റാണ്ടിൽ ജീവിച്ചിരുന്ന മഹാനായ അലക്സാണ്ടർ ചക്രവർത്തി ലോകം വെട്ടിപ്പിടിച്ചു എന്ന് നമ്മൾ വായിച്ചറിഞ്ഞിട്ടുണ്ട്. ചരിത്രത്തിലെ ഏറ്റവും വലിയ സാമ്രാജ്യങ്ങളിലൊന്നാണ് 32 വയസ്സിന്റെ ചെറിയ ആയുസ്സിനിടെ അലക്സാണ്ടർ പടുത്തുയർത്തിയത്. എന്നാൽ, ഡീഗോ മാറഡോണ 26-ാം വയസ്സിൽ സ്ഥാപിച്ച സാമ്രാജ്യത്തിന്റെ അത്ര വലുപ്പമൊന്നും അതിനില്ലായിരുന്നു. മാറഡോണ അർജന്റീനക്കാരനായിരിക്കാം. പക്ഷേ, ലോകത്തിന്റെ സകലകോണുകളിലും അയാൾ ഫുട്ബോളിന്റെ ആരാധനാസാമ്രാജ്യം കെട്ടിപ്പടുത്തു. ലോകത്തെ ഇക്കാലത്തെ ഏറ്റവും വലിയ സാമ്രാജ്യം അർജന്റീനാ ആരാധകരുടേതായിരിക്കും. ലോകത്തെ ഇരുന്നൂറിലേറെ രാജ്യങ്ങളിലും പ്രവിശ്യകളിലും ഡീഗോയെ നെഞ്ചിലേറ്റുന്ന ജനതയുണ്ട്. അതിലും വലിയ കൂട്ടായ്മ ലോകം ഇനി കാണാനിരിക്കുന്നതേയുള്ളൂ.