കുറുക്കൻപാറയിലെ ദേവശില്പികൾ

 കല്പനകൾ കരിങ്കല്ലിൽ കൊത്തിയെടുക്കുന്ന ശില്പികളുടെ ഗ്രാമം, കുന്ദംകുളത്തെ കുറുക്കൻപാറ. കൃഷ്ണശിലകൾ ഇവിടെ ദേവരൂപങ്ങളായി മാറുന്നു

- suraj

ഏത് ശിലയിലും ഒരു ശില്പമുണ്ട്. അത് കാണാൻ പക്ഷേ,  ശില്പിയുടെ കണ്ണ് വേണം. കല്ല് കടഞ്ഞെടുക്കുമ്പോൾ രൂപം കൊള്ളുന്നത് വിഗ്രഹങ്ങളാവാം. കൽവിളക്കുകളാവാം, ദീപസ്തംഭങ്ങളോ മീസാൻ കല്ലു കളോ ആവാം. അത്തരം ശില്പങ്ങൾക്ക് നമ്മുടെ മനസ്സുകളെ നിശ്ചലമാക്കാനുള്ള കഴിവുണ്ട്. വത്തിക്കാനിലെ പിയത്തയും ഫ്ളോറൻസിലെ ദാവീദും നാം കൺചിമ്മാതെ ആസ്വദിക്കുന്നത് അതുകൊണ്ടാണ്. മധുരയിലെ ആയിരംകാൽമണ്ഡപവും അജന്താഗുഹയിലെ ശയനബുദ്ധനെയും കാണുമ്പോൾ ഒരിക്കലെങ്കിലും ആ മഹാശില്പികളെ മനസ്സുകൊണ്ട് നമിക്കും.

കല്ലുകളെ മനോഹരങ്ങളായ ശില്പങ്ങളാക്കി മാറ്റുന്ന കലാകാരന്മാരുടെ ഒരു ഗ്രാമം തന്നെയുണ്ട് തൃശ്ശൂരിൽ. കുന്ദംകുളത്തിന് സമീപത്തുള്ള കുറുക്കൻപാറയാണ് ആ ഗ്രാമം. കേരളത്തിന്റെ ശില്പകലാപാരമ്പര്യം തേടിയുള്ള യാത്ര ആരംഭിക്കേണ്ടത് ഇവിടെ നിന്നാണ്.

കുന്ദംകുളം-ഗുരുവായൂർ റോഡിൽ ഒരുകിലോമീറ്ററോളം മുന്നോട്ടുപോയാൽ റോഡരികിൽ തന്നെ കാണാം ശില്പങ്ങളുടെ നീണ്ടനിര. താർപായ വലിച്ചുകെട്ടിയ ഓലമേഞ്ഞ പണിയാലകൾ, കൃഷ്ണനും ഗണപതിയും ബുദ്ധനും മഹാത്മാഗാന്ധിയും നാഗരൂപങ്ങളുമെല്ലാമുണ്ട് ഇവിടെ. ചിത്രത്തൂണുകളും മീസാൻകല്ലുകളും കൽവിളക്കുകളും ഒരുവശത്ത് ഒരുങ്ങിക്കൊണ്ടിരിക്കുന്നു.

“കൈവിരലിൻ തുമ്പുകളിൽ കല്പനതൻ രൂപങ്ങൾ അദ്ഭുതമൂർത്തികളായ അവതരിച്ചിറങ്ങുന്നു' എന്ന് ഭാസ്കരൻമാഷ് എഴുതിയത് ഈ മഹാശില്പികളെ മനസ്സിൽ കണ്ടായിരിക്കില്ലേ! ഏറെ ആകാംക്ഷയോടെയാണ് കുറുക്കൻപാറയിലെത്തിയത്. കല്ല് ശില്പങ്ങളായി മാറുന്ന ജാലവിദ്യയെക്കുറിച്ച് അറിയണം, ശില്പികളുടെ ജീവിതത്തെക്കുറിച്ചും. ആരോടാണ് ഒന്ന് ചോദിക്കുക., ഇവിടത്തെ ജെയ്സേട്ടനെ പോയി കണ്ടോളൂ സീനിയർ പണിക്കാരൻ പുള്ളിക്കാരനാണ് റോഡരികിൽ നിന്ന ഒരു ഗഡി പറഞ്ഞു. നേരേ ജെയ്ട്ടന്റെ പണിപ്പുരയിലേക്ക്  കയറി.