കാരൈക്കുടിയിൽ ചെട്ടിയാന്മാരുടെ നാട്ടിൽ

തമിഴകത്തിലെ സമ്പന്നപ്രദേശമാണ് ചെട്ടിനാട് വാസ്തുവിദ്യകൾകൊണ്ടും പൈതൃകംകൊണ്ടും വ്യത്യസ്തത പുലർത്തുന്ന പ്രദേശം. അവിടുത്തെ സാംസ്കാരികസാമൂഹിക ഭൂമികയിലൂടെ പോയി വരാം

- NAZEEM SALI

തഞ്ചാവൂരിലെയും ശ്രീരംഗത്തെയും മഹാ ക്ഷേത്രങ്ങൾ കണ്ടുമടങ്ങുന്നതിനിടെയാണ് മനസ്സിലൊരു ചിന്ത ചെട്ടിനാടിലേക്ക് പോയാലോ? സൂര്യൻ തലയ്ക്ക് മുകളിൽ കത്തി ജ്ജ്വലിച്ചുനിൽക്കുന്ന മാർച്ച് മാസമായിരുന്നു യാത്ര. വേനൽച്ചൂടിനെ തെല്ലും വകവയ്ക്കാതെ വരണ്ടകാറ്റും കൃഷിയിടങ്ങളും പിന്നിട്ട് തൃച്ചി യിൽനിന്ന് കാരൈക്കുടിയിലേക്ക് ബസ് ഓടി ക്കൊണ്ടിരുന്നു. ഒരുപക്ഷേ, ചെട്ടിനാട് എന്ന പേര് കേൾക്കുമ്പോൾ "ചെട്ടിനാട് ചിക്കൻ കറി' എന്ന് ഹോട്ടലുകളിൽ തൂങ്ങിക്കിടക്കുന്ന ബോർഡായിരിക്കും മനസ്സിലേക്ക് ഓടിയെത്തുക. എന്നാൽ, പൈതൃകംകൊണ്ടും വാസ്തുവിദ്യാവൈഭവം കൊണ്ടും തമിഴകത്തെ സമ്പന്നമായ പ്രദേശമാണ് ചെട്ടിനാട്.

തമിഴ്നാടിന്റെ മധ്യഭാഗത്തായി സ്ഥിതിചെയ്യുന്ന പുതുക്കോട്ടെ ശിവഗംഗ ജില്ലയുടെ ഭാഗമാണിത്. രണ്ടരമണിക്കൂർ നീണ്ട ബസ് യാത്രയ്ക്കൊടുവിൽ കാരൈക്കുടിയിൽ എത്തിച്ചേർന്നു. അവിടെനിന്ന് ഓട്ടോറിക്ഷയിലായിരുന്നു ചെട്ടിനാടിന്റെ ഉൾഗ്രാമങ്ങളിലേക്കുള്ള യാത്ര. 

ആയിരം ജനൽ വീട്

കാരൈക്കുടിയിലെത്തുന്ന സഞ്ചാരികൾ ആദ്യം അന്വേഷിക്കുന്നത് ആയിരം ജനൽ വീടാണ്. മാളികയുടെ പേരുപോലെതന്നെ ഈ വീടിന് ആയിരം ജാലകങ്ങളുണ്ട്. 1941-ൽ നാട്ടുകോട്ട ചെട്ടിയാർ നിർമിച്ച ഈ വീട് ചെട്ടിയാന്മാരുടെ വാസ്തുവിദ്യാവൈഭവത്തിന്റെ മകുടോദാഹരണമാണ്. 25 മുറികളും അഞ്ച് വലിയ ഹാളുകളും അടങ്ങുന്നതാണ് ആയിരം ജനൽ വീട്. ആത്താനഗുഡി ടൈലുകൾ പാകിയ മനോഹരമായ ഹാളുകൾ, ജനാലയിലൂടെ നോക്കിക്കാണുവാൻ മാത്രമേ സാധിക്കുകയുള്ളൂ. കാരണം, ഇതിന്റെ ഉടമസ്ഥൻ മറ്റെങ്ങോ കുടിയേറി പാർത്തിരിക്കുകയാണ്. ആയിരം ജനൽ വീട് താഴിട്ട് പൂട്ടിയ വാതിലുകളാലും കൊട്ടിയടയ്ക്കപ്പെട്ട നിലവറകളാലും നിശ്ശബ്ദതയെ പുൽകി ഉറങ്ങുന്നു.

ആത്താൻഗുഡിയിലെ വിസ്മയങ്ങൾ