മുടിയിൽ വിരിയും മഴവില്ലഴക്

മുടിയിഴകളിൽ മഴവില്ല് വിരിയിക്കുന്ന ഹെയർ കളറിങ് രീതിയാണ് ഓയിൽ സ്റ്റിക്ക്. ഇനി ട്രെൻഡ് മനസ്സിലാക്കി സ്റ്റൈലിഷായും അല്പം കരുതലോടെയും മുടി കളർ ചെയ്യാം

- ടാന്യ ഉണ്ണി എഫ്. ആർ. എ. സി. ജി. പി., ഡിപ് ഡെർമറ്റോളജി

പണ്ടൊക്കെ തലയിൽ വെളുത്ത ഒരു മുടിയിഴ കണ്ടാൽ മതി, അയ്യോ നരയ്ക്കുന്നേ എന്ന ആധിയായിരുന്നു. ഇന്ന് കാശുമുടക്കി മുടി വെളുപ്പിക്കുന്നത് ട്രെൻഡാണ്. ഇതുവരെ പെട്ടെന്ന് തിരിച്ചറിയാത്ത രീതിയിലായിരുന്നു മിക്കവരും മുടിക്ക് നിറം നൽകിയിരുന്നതെങ്കിൽ ഇപ്പോൾ പച്ച, നീല, ചുവപ്പ്, വെള്ള, വയലറ്റ് തുടങ്ങി ഒറ്റയടിക്ക് മുടി മഴവില്ലുപോലെ തിളങ്ങുന്ന തരത്തിലായി കളറിങ്. മുടി കളർ ചെയ്യുന്നവരുടെ എണ്ണം കൂടിവരികയാണ്. നാടൻ ലുക്കിൽനിന്ന് പെട്ടെന്ന് കിടിലൻ ലുക്കിലേക്കൊരു മേക്കോവർ വേണമെങ്കിൽ എല്ലാവരും ആദ്യം തിരഞ്ഞെടുക്കുന്ന മാർഗം ഹെയർ കളറിങ്ങാണ്.

നിറങ്ങൾ തിരഞ്ഞെടുക്കുമ്പോൾ

ഓരോരുത്തരുടെയും മുടിയുടെ ടെക്സ്ചർ മനസ്സിലാക്കി ഇണങ്ങുന്ന തരത്തിലുള്ള നിറങ്ങൾ തിരഞ്ഞെടുക്കാം. ചർമത്തിന്റെ നിറവും കണ്ണുകളുടെ നിറവും ഉൾപ്പെടെ നോക്കി മുടിക്ക് നിറം നൽകുന്നതാകും നല്ലത്. കൃത്രിമമായി തോന്നുന്ന വ്യത്യാസമാണോ ചെറിയൊരു പുതുമയോടുകൂടിയ തനതായ മാറ്റമാണോ വേണ്ടതെന്നതനുസരിച്ച് നിറം തിരഞ്ഞെടുക്കാം. ചെറിയ മഞ്ഞപ്പു കലർന്ന വെളുപ്പാണ് നിങ്ങൾക്കുള്ളതെങ്കിൽ മഞ്ഞ, ഗോൾഡ് ഒഴികെയുള്ള കടുത്ത നിറങ്ങൾ തിരഞ്ഞെടുക്കാം. പിങ്ക് നിറം കലർന്ന വെളുപ്പാണെങ്കിൽ ചുവപ്പുകലർന്ന നിറങ്ങൾ ഒഴിവാക്കുന്നതാണ് നല്ലത്. ഇരുണ്ട നിറക്കാർക്ക് ബർഗണ്ടി, ചുവപ്പ് നിറങ്ങൾ ഏറെ ചേരും.