കവിത തുളുമ്പുന്ന വീട്

വള്ളുവനാടൻ ഗ്രാമഭംഗി തുളുമ്പുന്ന വഴിയോരത്ത് മൺചുവരുകളിൽ പടുത്ത ആ വീട് കാണാം...കുഞ്ചൻ നമ്പ്യാർ പിറന്ന വീട്

- വി. പ്രവീണ

അരിശം തീരാതെ വേനൽ ആ പുരയുടെ ചുറ്റും തെളിഞ്ഞുകത്തിയ മേടപ്പകൽ. നേർത്ത തണുപ്പുമായി പാഞ്ഞുവന്ന കിഴക്കൻ കാറ്റ് തനിക്ക് ശൗര്യം പണ്ടെപ്പോലെ ഫലിക്കുന്നില്ലെന്ന വ്യഥയോടെ എവിടെയോ പോയൊളിച്ചു. കാറ്റും വെയിലും തമ്മിലുള്ള ഈ മത്സരത്തിന് സാക്ഷിയായി കാലങ്ങളായി ഇവിടെയുണ്ട് ഈ പുര, പാലക്കാട് ഒറ്റപ്പാലത്തിനും മങ്കരയ്ക്കും ഇടയിൽ ലക്കിടിയിലെ തീവണ്ടിപ്പാളങ്ങളിൽ നിന്ന് അധികനാഴിക അകലെയല്ലാതെ കാലത്തിന്റെ തണുപ്പൊളിപ്പിച്ച പഴയ മൺവീട്. കിള്ളിക്കുറിശ്ശിമംഗലത്തെ കലക്കത്ത് ഭവനം. സാക്ഷാൽ കുഞ്ചൻ നമ്പ്യാരുടെ വീട്. മിഴാവിന്റെ താളത്തിനൊത്ത് ജീവിതവ്യഥകളെ കലയുടെ രസച്ചരടിൽ കൊരുത്ത് കാലപ്രവാഹത്തിലേക്ക് ഒഴുക്കിവിട്ട കവിയുടെ തറവാട്.

പടിപ്പുര കടന്ന് 

വഴിയാകെ കുടപോലെ പന്തലിച്ച മാമരങ്ങളിൽ തത്തിക്കളിക്കുന്ന കാറ്റിന് കൊടുംവേനലിലും നിളയുടെ കുളിരുണ്ട്. അതിരിലൂടൊഴുകുന്ന പുഴയുടെ മറുകരയിൽ ചെന്നാൽ വില്വാദ്രിനാഥനെ തൊഴാം; വി.കെ.എൻ. കഥകളിലെ ഭൂമിക നേരിൽക്കാണാം. ഇക്കരെ ഈ ദേശം കുഞ്ചൻ നമ്പ്യാരുടെയും കിള്ളിക്കുറിശ്ശി മഹാദേവന്റെയുമാണ്. കലക്കത്ത് തറവാടിന്റെ പടിപ്പുര എത്തും മുൻപേ കിള്ളിക്കുറിശ്ശി മഹാദേവന്റെ ശ്രീകോവിൽ കാണാം.കലോപാസകരുടെ പരദൈവമാണ് കിള്ളിക്കുറിശ്ശിയിലെ മഹാദേവൻ. ഓട്ടൻതുള്ളൽ കലാകാരന്മാർക്ക് അരങ്ങേറ്റം കഴിഞ്ഞാൽ അടുത്ത അരങ്ങ് കിള്ളിക്കുറിശ്ശി മഹാദേവന്റെ തിരുനടയാണ്. അമ്പലത്തിന്റെ കവാടത്തിനരികിൽ നിന്ന് കുറച്ചൊന്നു മുന്നോട്ടു നടന്നാൽ കാണാം ചെമ്മ ണ്ണിൽ പടുത്ത പടിപ്പുര. അത് കടന്നു ചെന്നാൽ കാലത്തിന്റെ കരുത്തിന് കടപുഴക്കാനാവാത്ത തനിമയോടെ കലക്കത്ത് ഭവനം വാതിൽ തുറന്ന് അകത്തേക്ക് ക്ഷണിക്കും.

പ്രകൃതിയുടെ കവിത