മുന്നിലോടിയ രാധ

 പയ്യോളി മൈതാനത്തെ ട്രാക്കിൽ ഒരിക്കൽ പി.ടി. ഉഷയെ ഓടിത്തോൽപ്പിച്ച രാധ... കാലങ്ങൾക്കുശേഷം അവർ കണ്ടുമുട്ടിയപ്പോൾ വിഷ്ണു രാമകൃഷ്ണൻ

വർഷം 1975. പയ്യോളി ഗവൺമെന്റ് ഹൈസ്കൂൾ മൈതാനത്ത് സബ്ജില്ലാതല കായികമേള അരങ്ങേറുകയാണ്. ഓട്ടമത്സരങ്ങളാണ് അടുത്തത്. ആദ്യം 100 മീറ്റർ. തൃക്കോട്ടൂർ എ.യു.പി. സ്കൂളിലെ ഏഴാംക്ലാസ് വിദ്യാർഥി ഉഷയും മേലടി ഭജനമഠം യു.പി. സ്കൂളിലെ പി.കെ. രാധയും തമ്മിലാണ് പ്രധാന പോരാട്ടം. രണ്ട് സ്കൂളുകളും പണ്ടേക്കുപണ്ടേ ആജന്മശത്രുക്കൾ. ജയത്തിൽ കുറഞ്ഞ മറ്റൊന്നുമില്ലെന്ന ചിന്തയോടെ പോരിനിറങ്ങിയവർ. വിസിൽ മുഴങ്ങി. ഓട്ടം തുടങ്ങി. ഉഷ മുന്നിൽ തൊട്ടുപിറകെ രാധ വാശി നിറഞ്ഞുനിന്ന ഒന്നാം പോരിൽ ഉഷയ്ക്ക് ജയം. അടുത്തത്. 200 മീറ്റർ ആണ്. വിട്ടുകൊടുക്കാൻ ഉദ്ദേശ്യമില്ലെന്ന് രാധ... ചുണയുണ്ടങ്കിൽ തോൽപ്പിക്കെന്ന് ഉഷ. അവസാനം വരെ ആവേശം ചോരാതെ നിന്ന മത്സരത്തിൽ ഉഷയ്ക്ക് കാലിടറി. രാധ മുന്നിലെത്തി. വിജയത്തിൽ ആർപ്പുവിളികൾ ഉയർന്നു.

അന്ന് 200 മീറ്ററിൽ കാലിടറിയ പെൺകുട്ടി മനസ്സ് പതറാതെ പിന്നെയും ഓടിക്കൊണ്ടിരുന്നു. ട്രാക്കുകളിൽ നിന്ന് ട്രാക്കുകളിലേക്ക് വിശ്രമമില്ലാതെ കുതിച്ച് അവൾ രാജ്യത്തിനായി നേട്ടങ്ങളുടെ വലിയൊരു കണക്കു പുസ്തകം തന്നെ തുറന്നു. ലോകം ആ പെൺകുട്ടിയെ ഒളിംപ്യൻ പി.ടി. ഉഷയെന്ന് നീട്ടിവിളിച്ചു, പയ്യോളി എക്സ്പ്രസ്, ഗോൾഡൻ ഗേൾ തുടങ്ങിയ വിശേഷണങ്ങളും ചാർത്തിക്കൊടുത്തു. പക്ഷേ, ഉഷയെ തോൽപ്പിച്ച രാധയെ പിന്നെയെവിടെയും കണ്ടില്ല. ആരും അന്വേഷിച്ചില്ല.