പറയാനുണ്ടേറെ വിട എന്ന വാക്കൊഴികെ

ലാത്വിയക്കാരി ലിഗ സ്ക്രൊമാനെ കൊല്ലപ്പെട്ടത് കേരളത്തിൽ വച്ചാണ്... നീതിക്കായി അവരുടെ അനിയത്തി ഇലിസ് ഒറ്റയ്ക്ക് പോരാടുകയാണ്...

- അനന്യ. ജി

വാർത്തകളുടെ പെരുമഴയിൽ മലയാളിയുടെ ഓർമയിൽനിന്ന് ഒലിച്ചുപോയ മുഖമാണ് ലിഗയുടേത്. കടൽക്കോളും കായൽക്കാഴ്ചയും കണ്ട് മനസ്സിന്റെ കലമ്പലകറ്റാൻ അനിയത്തിക്കൊപ്പം കേരളത്തിലെത്തിയ ലാത്വിയക്കാരി ലിഗ സ്ക്രാമാനെ... അവളെ കാണാതാകുന്നു. ചേച്ചിയെ തേടി അനിയത്തി ഇലിസ് അലഞ്ഞ 37 ദിനങ്ങൾ. ആ തിരച്ചിൽ വാഴമുട്ടത്തെ കൂനംതുരുത്തിയിൽ അവസാനിച്ചപ്പോൾ ലിഗയുടെ മൃതദേഹത്തിന് ഒരു മാസത്തോളമുണ്ടായിരുന്നു പഴക്കം.

നാല് വർഷമായി നീളുന്ന വിചാരണ നടപടികളെ ആ അനിയത്തി ക്ഷമയോടെ പിന്തുടരുന്നു. പക്ഷേ, ഈ നവംബറിൽ അന്തിമ വിധിക്ക് നേർസാക്ഷിയാകാൻ അവളുണ്ടാകില്ല. പ്രവാസത്താൽ തകർന്നു തുടങ്ങിയ ബിസിനസ് കരകയറ്റാൻ നാട്ടിലേക്ക് പറക്കും മുൻപേ കേരളത്തോട് ഇലിസിന് പലതും പറയാനുണ്ട്... വിട എന്ന വാക്കൊഴികെ.

വിഷാദബിന്ദുവായ്

2018 ഫെബ്രുവരി മൂന്നിനാണ് ലിഗയും ഇലിസും കേരളത്തിലെത്തിയത്. തുടർന്ന് സംഭവിച്ചത് എന്തൊക്കെയെന്ന് ഇലിസ് ഓർത്തെടുക്കുന്നത് നടുക്കത്തോടെയാണ്... “ഏപ്രിൽ 18-ന് മടങ്ങിപ്പോകാനായിരുന്നു പ്ലാൻ. കൊച്ചിയിലും അമൃതപുരിയിലും തങ്ങി ഫെബ്രുവരി 21-ന് തിരുവനന്തപുരത്ത് ഒരു ആയുർവേദ സെന്ററിലെത്തി. ലിഗയുടെ വിഷാദരോഗ ചികിത്സയ്ക്ക് വേണ്ടിയായിരുന്നു ആ യാത്ര. മാർച്ച് 14 ന് രാവിലത്തെ യോഗാക്ലാസ് തലവേദനയാണെന്നു പറഞ്ഞ് ലിഗ മുടക്കി. ഞാൻ ക്ലാസ് കഴിഞ്ഞ് വന്നപ്പോൾ റൂമിൽ അവളില്ല. വിഷാദവും ഉറക്കമില്ലായ്മയും അവളെ പിന്തുടരുന്നുണ്ടെന്ന് എനിക്കറിയാമായിരുന്നു. എങ്കിലും ഒറ്റയ്ക്ക് ദൂരെ പോകില്ല എന്നുറപ്പുണ്ടായിരുന്നു.

ഭയം പുതച്ച നാളുകൾ