അഞ്ചലിന്റെ പ്രതികാരം

കൂത്താട്ടുകുളത്തെ പെയിന്റ് പണിക്കാരന്റെ മകൻ അഞ്ചൽ കൃഷ്ണയ്ക്ക് ഡോക്ടറുടെ വെള്ളക്കോട്ട് ഒരു മധുരപ്രതികാരമാണ് 

- രമ്യ ഹരികുമാർ

പെയിന്റ് പണിക്കാരൻ തങ്കപ്പന്റെ മകന് അച്ഛന്റെ പണി പോരെ?'' എം.ബി.ബി.എസ്. ബിരുദമായിരുന്നു ഈ ചോദ്യത്തിന് കൂത്താട്ടുകുളം വേലംപറമ്പിൽ തങ്കപ്പന്റെ മകൻ അഞ്ചൽ കൃഷ്ണയുടെ മറുപടി. ഉപരിപഠനത്തിനായി സാമ്പത്തിക സഹായം ചോദിച്ച് നാട്ടിലെ സമ്പന്നനെ സമീപിച്ചപ്പോൾ മാത്രമല്ല,  വേർതിരിവിന്റെ മുനയൊളിപ്പിച്ച ഈ ചോദ്യം പിന്നീടും അഞ്ചലിന്റെ ജീവിതത്തിൽ ആവർത്തിക്കപ്പെട്ടു കൊണ്ടിരുന്നു. മാതാപിതാക്കൾക്കൊപ്പമുളള എം.ബി.ബി.എസ്. ബിരുദദാന ചടങ്ങിലെ മനോഹരമായ ചിത്രം സാമൂഹിക മാധ്യമങ്ങളിൽ പങ്കുവെച്ച് അഞ്ചൽ കൃഷ്ണ ആ ചോദ്യങ്ങൾക്കുള്ള മറുപടി മധുരിതമായി എഴുതി...

“നിങ്ങൾക്കൊക്കെ എം.ബി.ബി.എസിന് സീറ്റുകിട്ടാൻ എളുപ്പമാണല്ലോ എന്ന് പറഞ്ഞ ആളെ ക്വിസ്സിന് പ്രസ് കിട്ടാൻ നിങ്ങൾക്കൊക്കെ എളുപ്പമാണല്ലോ എന്ന് പറഞ്ഞ ആളെ, എന്തിന് സംസ്ഥാന കലോത്സവത്തിന് പ്രൈസ് കിട്ടാൻ “നിങ്ങൾക്കൊക്കെ എളുപ്പമാണല്ലോ... എന്നൊക്കെ പറഞ്ഞവരെ ഓർക്കുന്നു. അന്നൊന്നും ഉത്തരം പറയാൻ കഴിഞ്ഞിട്ടില്ല. ഇപ്പോൾ പറയുന്നു എന്റെയും എന്റെ വംശത്തിന്റെയും വിദ്യാഭ്യാസം ആരുടെയും ഔദാര്യമല്ല...

സ്വപ്നങ്ങൾ വിദൂരം

“സ്വപ്നം കാണുന്നതിൽ നിന്നു പോലും എന്നെ തുടക്കത്തിൽ മുരടിപ്പിച്ചു കളഞ്ഞിട്ടുണ്ട്. കോളനികളിലും ചെറിയ ചെറിയ ഇടങ്ങളിലും എത്ര കുട്ടികൾ പഠിക്കുന്നുണ്ട്. അവർക്ക് ഉയ രങ്ങൾ കീഴടക്കണം എന്ന് ആഗ്രഹമുണ്ടാകും. പക്ഷേ, നിൽക്കുന്ന ഇടത്തിൽ എന്തെങ്കിലും വിജയം കൈവരിക്കണം എന്നുമാത്രമേ അവർക്ക് ചിന്തിക്കാൻ പോലും കഴിയൂ. സ്വപ്നം കാണാനും നല്ല പ്രിവിലെജ് വേണം...'' ബിരുദം പൂർത്തിയാക്കി പാലക്കാട് മെഡിക്കൽ കോളേജിൽ ഹൗസ് സർജൻസി ചെയ്യുകയാണ് അഞ്ചൽ. “കുടുംബത്തെ സുരക്ഷിതമാക്കണം എന്ന ആഗ്രഹമുളളതു കൊണ്ടുതന്നെ ജോലി ചെയ്തുകൊണ്ട് പി.ജി. ചെയ്യാനാണ് തീരുമാനം... അനുഭവങ്ങളിൽ നിന്ന് അഞ്ചൽ സംസാരിച്ചു തുടങ്ങി.

ചോദ്യങ്ങളേറെ