പെൺതെയ്യം

സ്ത്രീകൾ മാത്രം അവതരിപ്പിക്കുന്ന വടക്കേ മലബാറിലെ തെയ്യമാണ് ദേവക്കൂത്ത്. പണ്ട് ആ തെയ്യം കെട്ടിയിരുന്ന ലക്ഷ്മിയമ്മയും അവർക്ക് പിന്തുടർച്ചാവകാശിയായി വന്ന അംബുജാക്ഷിയും തെയ്യാനുഭവങ്ങൾ പങ്കുവയ്ക്കുന്നു...

- വിഷ്ണു രാമകൃഷ്ണൻ

തെയ്യത്താളമുള്ള നാടാണ് വടക്കേ മലബാർ ക്ഷേത്രങ്ങളിലും കാവുകളിലും ദൈവമുറഞ്ഞാടുന്ന കാലമാണിത്. തീചാമുണ്ഡിയും മുച്ചിലോട്ട് ഭഗവതിയും കതിവനൂർ വീരനുമെല്ലാം വാദ്യമേളങ്ങളുടെയും നൃത്തച്ചുവടുകളുടെയും അകമ്പടിയോടെ നാട്ടുമണ്ണിലിറങ്ങി, ഭക്തർക്ക് അനു ഗ്രഹം ചൊരിയുന്ന നാളുകൾ! തെയ്യങ്ങളുടെ എണ്ണമെടുത്താൽ, അഞ്ഞൂറിലധികമെന്നാകും ഉത്തരം. പക്ഷേ, കെട്ടിയാടുന്ന തെയ്യങ്ങളുടെ എണ്ണം നൂറോളം വരും. അമ്മത്തെയ്യങ്ങളാണ് ഭൂരിഭാഗവും. ഈ തെയ്യവേഷങ്ങളണിഞ്ഞ് എത്തുന്നതാകട്ടെ, പുരുഷന്മാരും. ഇതിൽ നിന്ന് വ്യത്യസ്തമായി സ്ത്രീകൾ മാത്രം കെട്ടിയാടുന്ന ഒരു തെയ്യമുണ്ട് ഉത്തരകേരളത്തിൽ കണ്ണൂരിലെ പഴയങ്ങാടിയിലുള്ള ചെറുകുന്ന് തെക്കുമ്പാട് കൂലോം തായക്കാവ് ക്ഷേത്രത്തിൽ അരങ്ങേറുന്ന ദേവക്കൂത്ത്, പല തലമുറകളിൽപ്പെട്ട സ്ത്രീകൾ കെട്ടിയാടിവന്ന തെയ്യം ഇപ്പോളവതരിപ്പിക്കുന്നത് അംബുജാക്ഷിയാണ്. ആദ്യമായി തെയ്യവേഷമണിഞ്ഞ സ്ത്രീയുടെ പേര് ചിരുത. ഏറ്റവും കൂടുതൽ തവണ ദേവക്കൂത്താടിയതും ചിരുതയാണ്. അതിനുശേഷം ഏറ്റവും കൂടുതൽ കാലം ഈ തെയ്യമവതരിപ്പിച്ചത് ലക്ഷ്മിയമ്മയാണ്. രണ്ടുവർഷം കൂടുമ്പോൾ അരങ്ങേറുന്ന ഈ തെയ്യം പതിന്നാലുവർഷത്തിനിടയിൽ ഏഴു തവണയാണ് ലക്ഷ്മിയമ്മ കെട്ടിയാടിയത്. ലക്ഷ്മിയമ്മയ്ക്കിപ്പോൾ വയസ്സ് എഴുപത്തിരണ്ട് കഴിഞ്ഞു. ദേവക്കൂത്തവതരിപ്പിച്ചവരിൽ ഇന്ന് ജീവിച്ചിരിക്കുന്ന ഏറ്റവും പ്രായമുള്ള സ്ത്രീയും ലക്ഷ്മിയമ്മതന്നെ. 2010-ൽ ലക്ഷ്മിയമ്മ തെയ്യവേഷമഴിച്ചപ്പോൾ ബന്ധു അംബുജാക്ഷി പിന്തുടർച്ചാവകാശി യായി പോസ്റ്റോഫീസ് ജീവനക്കാരിയായ അംബുജാക്ഷി 2012-ൽ ആണ് ആദ്യമായി ദേവക്കൂത്തവതരിപ്പിക്കുന്നത്. ഇതുവരെ ആറുതവണ അവർ തെയ്യമാടി.

അപ്രതീക്ഷിത നിയോഗങ്ങൾ

ലക്ഷ്മിയമ്മയുടെ ഭർത്താവ് കാട്ടൂപ്പറ കേളുപ്പണിക്കരും അംബുജാക്ഷിയുടെ ഭർത്താവ് കണ്ണൻ പണിക്കരും നാട്ടിലെ അറിയപ്പെടുന്ന തെയ്യക്കലാകാരന്മാരാണ്. അംബുജാക്ഷിയുടെ മകനും അതേ വഴിയി ലുണ്ട്. അവിചാരിതമായി തെയ്യവേഷം കെട്ടാനുള്ള നിയോഗം തനിക്ക് വന്നുചേർന്ന കഥപറഞ്ഞ് ലക്ഷ്മിയമ്മ സംസാരം തുടങ്ങി.