അമ്മ എന്റെ നിലാവെട്ടം

അമ്മയുടെ ആദ്യപുസ്തകത്തിൻറ പ്രകാശനവേളയിൽ കാണികളിലൊരാളായി മഞ്ജു വാര്യർ. അമ്മയെന്ന സ്നേഹ നിലാവിനെപ്പറ്റി പ്രിയനായിക സംസാരിക്കുന്നു

- സൂരജ് സുകുമാരൻ

ശക്തന്റെ മണ്ണ് സന്ധ്യയുടെ ചേല ചുറ്റിത്തുടങ്ങിയതേയുള്ളൂ. അക്ഷരപ്രേമികൾക്കുമുന്നിൽ പാറമേക്കാവ് ക്ഷേത്ര അഗശാലയിലേക്കുള്ള വഴി തെളിഞ്ഞുകിടന്നു. അഗ്രശാലയിൽ മാതൃഭൂമി പുസ്തകോത്സവത്തിൽ ഗിരിജ വാര്യർ രചിച്ച “നിലാ വെട്ടം' എന്ന കൃതിയുടെ പ്രകാശനത്തിന് നിമിഷങ്ങൾ ബാക്കി. നോക്കിയിരിക്കേ മുറ്റത്തേക്കൊരു കറുത്തകാർ വന്നുനിന്നു. അതിൽ നിന്ന് ഗിരിജ വാര്യർ പുറത്തിറങ്ങി, ഒപ്പം മകൻ മധു വാര്യരും. കാറിൽ നിന്ന് അവസാനം പുറത്തിറങ്ങിയ അതിഥിയെ കണ്ടതും ക്ഷേത്രനഗരിയിൽ ചിതറിക്കിടന്ന മനുഷ്യർ മുഴുവൻ അവരിലേക്ക് ചുരുങ്ങി. അമ്മയുടെ കൈപിടിച്ച് ആൾക്കൂട്ടത്തിന് നടുവിലൂടെ ഒരു ചെറുചിരിയോടെ പ്രിയനായികയും ഗിരിജ വാര്യരുടെ മകളുമായ മഞ്ജു വാര്യർ ഹാളിലേക്ക് വേദിയിലേക്കുള്ള സംഘാടകരുടെ ക്ഷണം സ്നേഹപൂർവം നിരസിച്ച് കാണികളിലൊരാളായി മഞ്ജു സദസ്സിൽ ഇരുന്നു. ഒരു കൊച്ചുകുട്ടിയുടെ കൗതുകത്തോടെ, ആശ്ചര്യത്തോടെ അമ്മയുടെ ജീവിതത്തിലെ ആ സുവർണനിമിഷം മഞ്ജു ആസ്വദിച്ചു. നാലുപതിറ്റാണ്ടിനുശേഷം അമ്മയുടെ എഴുത്തുവഴിയിലേക്കുള്ള മടങ്ങിവരവിന് പ്രോത്സാഹനം നൽകിയ മകൾ, താരപദവിയുടെ അലങ്കാരങ്ങളൊന്നുമില്ലാതെ അമ്മയുടെ ആദ്യപുസ്തക പ്രകാശനത്തിനും സാക്ഷിയായി. ജീവിതത്തിലെ പ്രതിസന്ധിഘട്ടങ്ങളിൽ പരസ്പരം താങ്ങും തണലുമായവരാണ് ഈ അമ്മയും മകളും. ഗൃഹലക്ഷ്മി'യുടെ ഫോട്ടോ ഷൂട്ടിനായി അമ്മയ്ക്കൊപ്പം നിന്നപ്പോൾ ആ സുന്ദരദിവസത്തിന്റെ സന്തോഷം മുഴുവൻ മഞ്ജുവിന്റെ മുഖത്ത് തെളിഞ്ഞു. ആ സന്തോഷം അവരുടെ വാക്കുകളിലും നിറഞ്ഞുനിന്നു.

അമ്മയിലെ എഴുത്തുകാരിയെ മഞ്ജുവിന് മുൻപേ പരിചയമുണ്ടായിരുന്നോ?