സഭയ്ക്കപ്പുറം സതീശൻ

നടുത്തളത്തിൽ പ്രതിപക്ഷ നേതാവ് വി.ഡി സതീശൻ

- അജ്മൽ പഴേരി

1996, ഹൈക്കോടതിയിൽ കേസുകളുടെ തിരക്കിലോടുകയായിരുന്ന ചെറുപ്പക്കാരനായ ഒരു വക്കീലിനോട് കോൺഗ്രസ് കമ്മിറ്റി അടുത്ത നിയമസഭാ തിരഞ്ഞെടുപ്പിൽ പറവൂരിൽനിന്ന് മത്സരിക്കാൻ ആവശ്യപ്പെട്ടു. കാമ്പസ് രാഷ്ട്രീയത്തിലെ മുൻ പരിചയവും എൻ.എസ്.യു സെക്രട്ടറി, എം.ജി.യൂണിവേഴ്സിറ്റി യൂണിയൻ ചെയർമാൻ, യൂണിവേഴ്സിറ്റി യൂണിയൻ കൗൺസിലർ സ്ഥാനവുമൊക്കെയാണ് വക്കീലിന് തിരഞ്ഞെടുപ്പിലേക്ക് വഴി കാട്ടിയത്. ആലോചിച്ചൊരു തീരുമാനമെടുക്കാനുള്ള സമയമില്ല, എന്തായാലും വക്കീൽ മറുത്തൊന്നും പറഞ്ഞില്ല. കേസിനും വക്കാലത്തിനും താത്കാലികാവധി പ്രഖ്യാപിച്ച് ഗോദയിലേക്ക്. പക്ഷേ, കാര്യങ്ങൾ അനുകൂലമായില്ല. കോടതിമുറിയിൽ എതിരാളികളെ നിർത്തിപ്പൊരിച്ച യുവവക്കീൽ രാഷ്ട്രീയഅങ്കത്തട്ടിൽ പൊരുതി വീണു. അന്ന് തോറ്റിട്ടും വക്കീൽ, രാഷ്ട്രീയത്തിൽ തുടർന്നു. തോൽവി ഒന്നിന്റെയും അവസാനമല്ലെന്ന് തെളിയിച്ചു.

കന്നിയങ്കത്തിൽ പതറിയ അതേ പറവൂരിൽ നിന്ന് പിന്നീട് ജയിച്ച് നിയമസഭയിലെത്തി, ഇന്ന് കേരള നിയമസഭയുടെ പ്രതിപക്ഷ നേതാവിന്റെ കുപ്പായത്തിലാണദ്ദേഹം. വി.ഡി. സതീശൻ എന്ന പ്രതിപക്ഷനേതാവ് വാക്ക് കൊണ്ടും പ്രവൃത്തികൊണ്ടും എന്നും ജനപക്ഷത്താണ്. ശരികളെ വിവേചിച്ചും തെറ്റിനെ വിചാരണചെയ്തും കേരളരാഷ്ട്രീയത്തിന്റെ അമരത്ത് ആ പഴയ വക്കീലിന്റെ ഉത്സാഹവും കാര്യശേഷിയുമായി അദ്ദേഹം നിറയുന്നു. തിരക്കുകൾ മാറ്റിവെച്ച് കൊച്ചിയിലെ ദ ഗേറ്റ് വേ ഹോട്ടലിലേക്ക് പ്രതിപക്ഷ നേതാവ് എത്തുമ്പോൾ പ്രിയനേതാവിനോട് ചോദ്യങ്ങൾ തൊടുക്കാൻ ഒരുകൂട്ടം മിടുക്കികൾ കാത്തിരിപ്പുണ്ടായിരുന്നു. കൊച്ചിയിലെ വിവിധ കാമ്പസുകളിലെ വിദ്യാർഥിനികളായ സാൻഡ സാജു, അജ്മി ഹാലിദ്, സ്റ്റെഫിഗ്രാഫ് രാജു, രഞ്ജിത രമേശൻ എന്നിവർ പ്രതിപക്ഷനേതാവുമൊത്തിരുന്നപ്പോൾ അത് സഭയ്ക്കു പുറത്താരു ചോദ്യോത്തരവേളയായി.

ആദ്യത്തെ തിരഞ്ഞെടുപ്പിൽ പരാജയമായിരുന്നു. ആ തോൽവിയാണോ പിന്നീട് വിജയത്തിനുള്ള പാഠമായത്?