ഇതാ ഒരു വിജയ'ഗീത'

മികച്ച കളക്ടർക്കുള്ള സംസ്ഥാന റവന്യൂ അവാർഡ് സ്വന്തമാക്കിയ എ. ഗീത. കലോപാസകയായ കളക്ടർക്ക് ഇനി തട്ടകം കോഴിക്കോട്

- നീനു മോഹൻ

അപ്രതീക്ഷിതമായൊരു ഉത്തരവിൽ വയനാട്ടിൽ നിന്ന് കോഴിക്കോട്ടേക്ക് സ്ഥലംമാറിപോകുന്ന കളക്ടർ എ.ഗീത. അവർക്ക് സഹപ്രവർത്തകർ നൽകിയ യാത്രയയപ്പ് ഔപചാരികമായിരുന്നില്ല. നിറകണ്ണുകളോടെയായിരുന്നു എല്ലാവരും സദസ്സിലിരുന്നത്. സംസാരിക്കുന്നതിനിടെ ഇടയ്ക്ക് കളക്ടറുടെ കണ്ണും നിറഞ്ഞു. വയനാട് കളക്ടറുടെ കല്പറ്റയിലെ ക്യാ മ്പ് ഓഫീസിന് എ. ഗീതയുണ്ടായിരുന്ന കാലത്തൊരിക്കലും അധികാരത്തിന്റെ ഔപചാരികതകൾ ഉണ്ടായിരുന്നില്ല. കളക്ടറെ കാണാനെത്തുന്നവർക്ക് മുമ്പിൽ മനസ്സുനിറയ്ക്കുന്ന ചിരിയുമായി അവരുണ്ടാകും. വലിയ ബഹളങ്ങളില്ല. ഉദ്ഘാടനവേദികളിലെ നിറസാന്നിധ്യവുമല്ല കളക്ടർ ഗീത. പക്ഷേ, അർഹതപ്പെട്ടവരെ ചേർത്തുപിടിക്കാൻ ഇഷ്ടമുള്ള കാര്യങ്ങൾ ആത്മാർപ്പണത്തോടെ നിറവേറ്റാൻ മുൻപന്തിയിലുണ്ട് അവർ.

ആദിവാസികൾക്ക് ആറ് അടിസ്ഥാനരേഖകൾ നൽകുന്ന എ.ബി.സി.ഡി.ക്യാമ്പിന്റെ സാരഥ്യത്തിലുണ്ടാകുമ്പോഴും അരങ്ങിൽ കഥകളി പദത്തിനൊപ്പം ദമയന്തിയായി പകർന്നാടുമ്പോഴും ഒരേ ആത്മസമർപ്പണം. സംസ്ഥാന റവന്യൂ അവാർഡുകളിൽ മികച്ച കളക്ടർക്കുള്ള പുരസ്കാരം എ. ഗീതയെ തേടിയെത്തി. മികച്ച കളകറേറ്റ് വയനാടും സബ്കളക്ടർ ഓഫീസ് മാനന്തവാടിയും. വയനാട് സബ് കളക്ടർ ആർ. ശ്രീലക്ഷ്മി മികച്ച സബ് കളക്ടറായി. വയനാടിന്റെ ഈ നേട്ടങ്ങളിൽ ഇഷ്ടങ്ങളെ ചേർത്തുപിടിച്ചൊരു സ്ത്രീയുടെ മികവാണ് തെളിയുന്നത്.

പുതിയ ഇടം