ചായം ചാലിച്ച ജീവിതം

പുറംലോകത്തേ ക്കുള്ള വാതിലുകൾ കൊട്ടിയടച്ച രോഗത്തെ വരച്ച് തറപറ്റിച്ച മിടുമിടുക്കി - ജിഷ ആലക്കോട്

- സൂരജ് സുകുമാരൻ

അലക്കിത്തേച്ച യൂണിഫോം ധരിച്ച്, മുടി പിന്നിക്കെട്ടി, തോളിൽ ബാഗും കൈയിൽ കുടയും പുത്തൻ വാട്ടർ ബോട്ടിലുമൊക്കെയായി സ്‌കൂളിലേക്ക് ഉല്ലാസത്തോടെ പോകുന്ന കൂട്ടുകാരികൾ. ജനലഴികൾക്കിപ്പുറം ഇരുൾ നിറഞ്ഞ മുറിയിൽ പുറത്തേക്ക് കണ്ണുംനട്ട് കൊച്ചു ജിഷ ഒറ്റയ്ക്കിരുന്ന് ആ കാഴ്ചകണ്ടു... അനങ്ങാൻ പോലും അവൾക്ക് ഭയമായിരുന്നു. കാരണം അശ്രദ്ധമായ ചെറിയ അനക്കങ്ങൾ പോലും ശരീരത്തിന് കഠിനവേദന നൽകും. ആ ജനലഴികളിലൂടെ അവൾ ലോകത്തെ കണ്ടു. കാണുന്നതെല്ലാം അവൾ മനസ്സിൽ പതിച്ചു. പിന്നെ ആ വർണക്കാഴ്ചകളെ കടലാസുകളിലേക്ക് പകർത്താൻ ശ്രമിച്ചു. അങ്ങനെ ചായക്കൂട്ടുകൾക്കൊണ്ട് പുതിയ ലോകം അവൾ പണിതു.

ഓസ്റ്റിയോ ജനിസിസ് ഇംപെർഫെക്ടാ (എല്ലുപൊടിയുന്ന അസുഖം) എന്ന അപൂർവ രോഗം ബാധിച്ച ജിഷ ആലക്കോട് വരച്ചു വരച്ചാണ് ജീവിതത്തെ ജയിച്ചുകയറുന്നത്. ഇരുളടഞ്ഞുപോയ ജീവിതത്തെ അവൾ ചാ യക്കൂട്ടുകളിലൂടെ തിരിച്ചുപിടിച്ചു. അവളുടെ ചിത്രങ്ങൾ കാണാൻ ലോകം അവളിലേക്കെത്തി.ആ അതിജീവനയാത്രയുടെ കഥ അവൾ ഗൃഹലക്ഷ്മിയുമായി പങ്കുവെക്കുന്നു.

ചിറകൊടിഞ്ഞ ബാല്യം....

അറിവുവച്ച കാലം മുതൽ രോഗത്തിന്റെ ദുരിതത്തിലാണ് ഞാൻ. ആശുപത്രികളിൽ നിന്ന് ആശുപത്രികളിലേക്ക് ഓടിയ ബാല്യം. എല്ലാവരും കൈമലർത്തിയപ്പോൾ വേദനയുടെ ലോകം മാത്രമായിരുന്നു മുന്നിൽ. സ്കൂളിൽ പോകാനോ മറ്റുകുട്ടികളെ പോലെ കളികളിൽ ഏർപ്പെടാനോ സാധിക്കുമായിരുന്നില്ല. ഓരോ തവണ എല്ലു പൊടിയുമ്പോഴും പ്ലാസ്റ്ററിട്ട് വീടിന്റെ നാലുചുമരുകൾക്കുള്ളിൽ കഴിയുകയായിരുന്നു ഞാൻ പതിനഞ്ച് തവണ ശരീരത്തിന്റെ പലഭാഗങ്ങളിലായി എല്ലുകൾ പൊടിഞ്ഞിട്ടുണ്ട്. അങ്ങനെ മുറിയിലിരുന്ന നാളുകളിലാണ് വര ച്ചുതുടങ്ങിയത്. ശരിക്കും പുതിയൊരു ജീവിതത്തെ ഞാൻ വരയിലൂടെ നേടിയെടുക്കാൻ ശ്രമിക്കുകയായിരുന്നു. ചുറ്റുപാടും കാണുന്ന പ്രകൃതി ദൃശ്യങ്ങൾ ക്യാൻവാസിലേക്ക് പകർത്തി.