മാനികാവിലെ മഹാദേവൻ

പ്രകൃതിയും ഭക്തിയും ഇഴചേരുന്ന മീനങ്ങാടിയിലെ മാനികാവ് ശിവക്ഷേത്രം...

- പ്രീത അരിമുള

ഗംഗയുടെ കുത്തൊഴുക്കിന് ജട കൊണ്ട് തട തീർത്തവനാണ് കൈലാസനാഥൻ. വിശ്വനാഥനായ  മഹാദേവനെയും ഗംഗയെയും ഒരുമിച്ച് വയനാടിന്റെ കാനനഭംഗിക്ക് നടുവിൽ കാണണമെന്നുള്ളവർക്ക് മീനങ്ങാടിയിലേക്ക് വരാം. പ്രകൃതിഭംഗിയുടെയും ഭക്തിസാന്ദ്രമായ അന്തരീക്ഷത്തിന്റെയും സമന്വയം. അതാണ് വയനാട് മീനങ്ങാടിയിലെ മാനികാവ് ശിവക്ഷേത്രം. ആയിരക്കണക്കിന് വർഷങ്ങൾ പഴക്കമുള്ള സ്വയംഭൂ ശിവലിംഗമാണ് ഇവിടെയുള്ളത്.

വനത്തിനുള്ളിൽ മഹാമുനിമാർ തപസ്സ് ചെയ്തിരുന്ന, ആൾക്കാർക്ക് ഒട്ടുമില്ലാത്ത പ്രദേശമായിരുന്നു ഇവിടം. മഹാമുനി കാവാണ് കാലാന്തരങ്ങളിൽ ലോപിച്ച് മാനികാവായി മാറിയത്. മഹാമുനിമാരുടെ കഠിനതപസ്സിൽ സംപ്രീതനായ പരമശിവൻ പശ്ചിമഘട്ടത്തിലെ വനഭൂമിയിൽ ഗംഗയോടൊത്ത് അവതരിച്ചു എന്നാണ് ഐതീഹ്യം. 32 ഏക്കർ വനഭൂമിയിൽ സ്ഥിതിചെയ്തിരുന്ന ഈ ക്ഷേത്രത്തിന് ആദ്യം കൽപ്പാളികൾ കൊണ്ടുള്ള ചുമരുകൾ മാത്രമാണ് ഉണ്ടായിരുന്നത്. എന്നാൽ പിന്നീട് പല ഘട്ടങ്ങളിലായി ക്ഷേത്രം പുതുക്കിപ്പണിഞ്ഞു. ശിവലിംഗത്തിന്റെ മുകളിലേക്ക് മഴവെള്ളം നേരിട്ട് പതിയുന്ന വിധത്തിലാണ് പുതിയ മേൽക്കൂര പണികഴിപ്പിച്ചിട്ടുള്ളത്.