ട്രാക്ടറോടിക്കും വീട്ടമ്മമാർ..

വനിതാകൂട്ടായ്മയുടെ വേറിട്ട വിജയഗാഥ

- പ്രദീപ് ഉഷസ്സ് 

നേരം ശരിക്ക് വെളുത്ത് വരുന്നതേയുള്ളൂ.. നിറയെ പുകമഞ്ഞും നനുത്ത കാറ്റും. എന്നിട്ടും അതൊന്നും കൂസാതെ വിശാലമായ ആ വയലേലകൾ എപ്പോഴേ സജീവമായി കഴിഞ്ഞു. ആനന്ദനഗർ പുല്ലുകുളത്തിനരികിലെ, ആ പാടശേഖരത്തിലൂടെ ഇരമ്പി നീങ്ങിക്കൊണ്ടിരിക്കുന്നു ഒരു ട്രാക്ടർ.. അതോടിക്കുന്നതാകട്ടെ ഒന്നുരണ്ട് സ്ത്രീകളും. തൊട്ടടുത്തുതന്നെ ഇളകി മറിഞ്ഞ് കിടക്കുന്ന മൺകട്ടകൾ തട്ടിനിരത്തി മുന്നേറുന്ന രണ്ടുമൂന്ന് സ്ത്രീകൾ വേറെയും...

വേറിട്ട ഈ കാഴ്ചകൾ തൃശൂരിൽ നിന്നാണ്. ആധു നിക യന്ത്രവൽകൃത കാർഷികോപകരണങ്ങളുടെ സഹായത്തോടെ, കാർഷികവൃത്തിയിൽ ഒരു കൈ നോക്കാനിറങ്ങിയിരിക്കുകയാണ് മാടക്കത്തറയിലെ ഒരു കൂട്ടം വീട്ടമ്മമാർ.

തൊഴിലാളികളെ കിട്ടാനില്ലാത്തതിനാൽ, കൃഷി ചെയ്യാൻ കഴിയുന്നില്ലെന്ന വേവലാതികൾ, വിവിധ കോണുകളിൽ നിന്നും ഉയർന്നു കൊണ്ടിരിക്കുന്ന കാലത്താണ്. ആധുനിക യന്ത്രവൽകൃത കാർഷികോപകരണങ്ങളും, ശാസ്ത്രീയ കൃഷിരീതികളുമായി രംഗത്തെത്തിയ ഈ വീട്ടമ്മമാരുടെ കൂട്ടായ്മ ശ്രദ്ധേയമാകുന്നത്.

ആത്മവിശ്വാസം കരുത്താക്കി

നാലുവർഷം മുമ്പുവരെ, വീട്ടുപണികൾ മാത്രം നോക്കി ഒതുങ്ങിക്കഴിഞ്ഞിരുന്ന വീട്ടമ്മമാരായിരുന്നു, തൃശൂരിലെ മാടക്കത്തറ ചിറക്കേക്കോട് ആനന്ദനഗർ സ്വദേശിനികളായ ഷീബ ഷോബിനും, രമ്യ സുനിലും, രമ്യഷിജുവും, ലിബി ജിംസണും, ലിൻസി ജയനുമെല്ലാം.

ഒല്ലൂക്കര ബ്ലോക്ക് ഓഫീസിന് കീഴിലെ, അഗ്രോ സർവ്വീസ് സെന്ററിലേക്ക് ഉദ്യോഗാർത്ഥികളെ ആവശ്യമുണ്ടെന്ന പത്രപരസ്യമാണ് ഇവരുടെ ജീവിതത്തെ ഈവിധത്തിൽ മാറ്റിമറിച്ചത്.

പരസ്യം കണ്ട് ഒട്ടേറെപ്പേർ എത്തിയെങ്കിലും, മണ്ണിലിറങ്ങി അധ്വാനിക്കാനുള്ള മനസ്സുണ്ടെങ്കിൽ മാത്രമേ തൊഴിൽസേനയുമായി മുന്നോട്ടു പോകാനാകൂ എന്ന് മനസ്സിലായതോട, ആദ്യ ആവേശം കഴിഞ്ഞ് പലരും പിൻമാറി. അപ്പോഴും ആത്മവിശ്വാസത്തോടെ ഏറ്റെടുത്ത ദൗത്യത്തിൽ തന്നെ ഉറച്ചു നിൽക്കുകയായിരുന്നു ഈ വീട്ടമ്മമാരുടെ അഞ്ചംഗ കൂട്ടം.