ടൂവീലറും സ്ത്രീകളും

ഇവിടെ കുറിച്ചിട്ടുള്ള മാർഗ്ഗനിർദ്ദേശങ്ങൾ പാലിച്ചാൽ നിങ്ങളുടെ ടൂവീലർ യാത്ര സുഖകരവും സുഗമവുമാവും.

- പ്രീതാ അജയ്കുമാർ

ഇന്ന് യുവതികൾ മാത്രമല്ല പ്രായമായ സ്ത്രീകൾ പോലും ടൂവീലർ ഓടിച്ചു തുടങ്ങിയിരിക്കുന്നു. പുതിയ ഡ്രൈവിംഗ് ലൈസൻസ് നേടിയിട്ടുള്ളവർ ടൂ വീലർ ഉപയോഗിക്കുന്നതിനെക്കുറിച്ച് ചില കാര്യങ്ങൾ അറിഞ്ഞിരിക്കേണ്ടത് അത്യന്താപേക്ഷിതമാണ്. ഇവിടെ കുറിച്ചിട്ടുള്ള മാർഗ്ഗനിർദ്ദേശങ്ങൾ പാലിച്ചാൽ നിങ്ങളുടെ ടൂവീലർ യാത്ര സുഖകരവും സുഗമവുമാവും.

1. ചിലർ വണ്ടി സ്റ്റാന്റിൽ നിന്നും ഇറക്കി അതിനുശേഷം ഹാന്റിൽ ലോക്ക് തുറക്കാറുണ്ട്. ഇത് തെറ്റാണ്. സ്റ്റിയറിങ് ലോക്ക് തുറന്നശേഷം വണ്ടി സ്റ്റാന്റിൽ നിന്നും ഇറക്കുന്നതാണ് വണ്ടിയ്ക്ക് നല്ലതും സുരക്ഷിതവും.

2. ഒരിടത്ത് അൽപ്പസമയത്തേക്ക് മാത്രമേ വണ്ടി നിറുത്തി വയ്ക്കുന്നുവെങ്കിൽ സൈഡ് സ്റ്റാന്റ് ഇട്ടുവയ്ക്കാം. എന്നാൽ കുറെ അധികം സമയത്തേയ്ക്ക് നിറുത്തിവയ്ക്കുമ്പോളും, അധികം വണ്ടി കൾ ഉള്ളിടത്ത് നിറുത്തി വയ്ക്കുമ്പോഴും സെന്റർ സ്റ്റാന്റിൽ ഇട്ടുവയ്ക്കുന്നതാണ് ബുദ്ധി.

3. സാധാരണയായി ടൂവീലറുകളിൽ പവർമോഡ് (power mode), എക്കണോമി മോഡ് (economy mode) എന്നിങ്ങനെ രണ്ട് തരമുണ്ട്. അതിവേഗതയിൽ ഓടിക്കുമ്പോൾ വാഹനം പവർ മോഡിലേക്ക് താനേ മാറും. ഇങ്ങനെ മാറുമ്പോൾ ഇന്ധനം അധികം ചെലവാകും.

4. ടൂവീലർ ഓടിക്കുമ്പോൾ ഒരിക്കലും ഹെൽമറ്റ് ധരിക്കാതിരിക്കരുത്. നിങ്ങളുടെ തലയ്ക്കുള്ള ഏറ്റവും വലിയ സംരക്ഷണമാ ണത്. വണ്ടിയുടെ പിറകിൽ കുട്ടികളെ ഇരുത്തി ഓടിക്കുമ്പോൾ അവർക്കായുള്ള ഹെൽമറ്റ് ധരിപ്പിച്ച് കൂട്ടിക്കൊണ്ടുപോകുക. വിലക്കുറവുള്ള ഗുണനിലവാരമില്ലാത്ത ഹെൽമറ്റുകൾ ഉപയോഗിക്കരുത്.

5. ബ്രേക്ക് ചെയ്യുമ്പോൾ മുൻചക്രബ്രേക്ക്, പിൻചക്ര ബ്രേക്ക് ഇവ രണ്ടും കൂടി പതുക്കെ അമർത്തുന്നതാണ് നല്ലത്. ബ്രേക്ക് പ്രസ് ചെയ്യുമ്പോൾ ക്ലച്ചും ചേർത്ത് പ്രസ് ചെയ്യരുത്.

6. ചിലർ ഹാന്റിൽ ബാർ വല്ലാതെ അമർത്തിപ്പിടിക്കാറുണ്ട്. സാധാരണ രീതിയിൽ പിടിച്ചാൽ മതിയാവും. അധികം പ്രഷർ കൊടുത്ത് അമർത്തിപ്പിടിക്കുമ്പോൾ ദശകൾക്കും ഞരമ്പുകൾക്കും കൂടുതൽ പ്രഷറുണ്ടാവും.

7. പിന്നിൽ ആരെയെങ്കിലും ഇരുത്തിക്കൊണ്ടു പോവുകയാണെങ്കിൽ ഓടിക്കുവാനുള്ള ലാഘവം നിങ്ങൾക്ക് മനസ്സിലാവുന്നതുവരെ സ്പീഡ് കുറച്ച് വണ്ടി ഓടിക്കുക.