അരിട്ടപ്പട്ടിയുടെ സ്വന്തം "പാട്ടി"...

സംഘകാലത്തെ ആ സ്ത്രീശക്തിയുടെ പ്രതീകമായി മാറിയിരിക്കുകയാണ് “അരിട്ടിട്ടി പാട്ടി' എന്നു നാട്ടുകാർ സ്നേഹത്തോടെ വിളിക്കുന്ന വീരമ്മാൾ അമ്മ

- മൈക്കിൾ വർഗീസ് ചെങ്ങാടക്കരി

തമിഴ്നാടിന്റെ ചരിത്രത്തിൽ മധുരയ്ക്ക് സവിശേഷ പ്രാധാന്യമുണ്ട്. ചിലപ്പതികാരത്തിൽ സ്ത്രീശക്തിയുടെ പ്രതീകമായ കണ്ണകിയുടെ ക്രോധാഗ്നിയിൽ മധുര രാജധാനിയും പട്ടണവും ഒരിക്കൽ ചുട്ടുചാമ്പലായതാണ്. അക്കാലത്ത് പാണ്ഡ്യരാജവംശത്തിന്റെ ആസ്ഥാനമായിരുന്നു മധുര.

സംഘകാലത്തെ ആ സ്ത്രീശക്തിയുടെ പ്രതീകമായി മാറിയിരിക്കുകയാണ് “അരിട്ടിട്ടി പാട്ടി' എന്നു നാട്ടുകാർ സ്നേഹത്തോടെ വിളിക്കുന്ന വീരമ്മാൾ അമ്മ. 90 വയസ്സുള്ള വീരമ്മാൾ അമ്മ ഇന്ത്യയിലെ ഏറ്റവും പ്രായമേറിയ ഗ്രാമപഞ്ചായത്ത് പ്രസിഡന്റാണെന്ന് അറിയുമ്പോഴാണ് അരിട്ടിട്ടി പാട്ടിയെന്ന ഈ അമ്മയുടെ മഹത്വം മനസ്സിലാകൂ. മധുര ജില്ലാ ആസ്ഥാനത്ത് നിന്ന് 25 കിലോമീറ്റർ കിഴക്ക് മേലൂർ താലൂക്കിലാണ് അരിട്ടപ്പട്ടി പഞ്ചായത്ത്. തമിഴ്നാട്ടിലെ 12524 ഗ്രാമ പഞ്ചായത്തുകളിൽ അരിട്ടപ്പട്ടിക്ക് മാത്രം സ്വന്തമായ ഒരു ബഹുമതിയുണ്ട്. സംസ്ഥാനത്തെ ആദ്യത്തെ ജൈവവൈവിധ്യ പൈതൃകഗ്രാമമാണ് അരിട്ടപ്പട്ടി.

2022-ലാണ് മധുരയിലെ അരിട്ടപ്പട്ടി, മീനാക്ഷിപുരം വില്ലേജുകളെ ജൈവ വൈവിധ്യ പൈതൃക സൈറ്റുകളായി തമിഴ്നാട് സർക്കാർ പ്രഖ്യാപിച്ചത്. 12 തടാകങ്ങൾക്കും 200 പ്രകൃതിദത്ത നീരുറവകൾക്കും മൂന്ന് തടയണകൾക്കും സമീപമുള്ള ജലസ്രോതസ്സായി പ്രവർത്തിക്കുന്ന ഏഴ് തരിശായ കരിങ്കൽ കുന്നുകളുടെ ഒരു ശൃംഖലയാൽ ചുറ്റപ്പെട്ടതാണ് അരിട്ടിട്ടി ഗ്രാമം. പതിനാറാം നൂറ്റാണ്ടിൽ പാണ്ഡ്യരുടെ ഭരണകാലത്ത് നിർമ്മിച്ച ആനയ്ക്കൊണ്ടൻ തടാകം ഇവിടെയാണ് സ്ഥിതി ചെയ്യുന്നത്. ലാഗർ ഫാൽക്കൺ (ഫാൽക്കോ ജഗ്ഗർ), ഷഹീൻ ഫാൽക്കൺ (ഫാൽക്കോ പെരെഗ്രിനസ്), ബോനെല്ലിസ് ഈഗിൾ (അക്വില ഫാസിയാറ്റ്), ഇന്ത്യൻ പാംഗോലിൻ പോലുള്ള വന്യജീവികൾ എന്നിവയുൾപ്പെടെ ഇരുനൂറ്റിയമ്പതോളം പക്ഷി ഇനങ്ങളുള്ള ഈ ഗ്രാമത്തിന് സമ്പന്നമായ ജൈവശാസ്ത്രപരവും ചരിത്രപരവുമായ പ്രാധാന്യമുണ്ട്.