ഡ്രൈവിങ് സംസ്കാരം ന്യൂസീലൻഡിൽ

ന്യൂസീലൻഡിലെ ഗതാഗതനിയമങ്ങളാണു നമുക്കും. പിന്നെയെന്താണു ഗതാഗതസംസ്കാരത്തിൽ വ്യത്യാസം?

ന്യൂസീലൻഡിൽ കാലു കുത്തിയ ദിവസം എയർപോർട്ടിൽനിന്നു സുഹൃത്തിന്റെ കാറിലായിരുന്നു ആദ്യ യാത്ര. ഒരു റൗണ്ട് എബൗട്ടിൽ നിന്നു വലത്തോട്ടാണു തിരിയേണ്ടിയിരുന്നത്. ഇൻഡിക്കേറ്റർ ഇട്ടുകൊണ്ട് കാർ റൗണ്ട് എബൗട്ടിലേക്ക് കയറിയപ്പോൾ എന്റെ ഉള്ളൊന്നു കാഞ്ഞു. ഇടതു വശത്തുനിന്നും നേരെ എതിരെ നിന്നും കുറച്ചു കാറുകൾ റൗണ്ട് എബൗട്ടിലേക്ക് വന്നെത്തിക്കഴിഞ്ഞിരുന്നു. ബൈക്ക് ചവിട്ടലുകൾ, ഹോൺ അടി, ചീത്തവിളി ഒക്കെ ഒരു നിമിഷം കൊണ്ട് എന്റെ മനസ്സിൽ മിന്നി മറഞ്ഞു. എന്നെ അമ്പരപ്പിച്ചുകൊണ്ട് ഇടതുനിന്നും എതിരെ നിന്നും വന്ന കാറുകൾ ഞങ്ങൾക്ക് വേണ്ടി നിർത്തിത്തന്നു. അതൊന്നും ശ്രദ്ധിക്കാത്ത മട്ടിലാണു സുഹൃത്ത് അനായാസം വലത്തോട്ട് തിരിച്ചു ഞങ്ങൾക്ക് പോകേണ്ട വഴിയിലേക്കു കാർ എടുത്തത്. നാട്ടിൽ റൗണ്ട് എബൗട്ടിലെ ഉന്തും തള്ളും ഓർത്തു കൊണ്ടാണ് ഞാൻ സുഹൃത്തിനോട് ചോദിച്ചത് “ നീ, എന്തു ധൈര്യത്തിലാണ് റൗണ്ട് എബൗട്ടിലൂടെ ആരെയും നോക്കാതെ വലത്തോട്ടു തിരിച്ചത്? ആ നേരെ വന്ന കാറോ ഇടത്തു നിന്നും വന്ന കാറോ ബ്രേക്ക്  ചവിട്ടിയില്ലായിരുന്നുവെങ്കിൽ?' ചിരിച്ചുകൊണ്ടാണ് അവൻ ഉത്തരം പറഞ്ഞത്, “അവർ നിർത്തും. അതാണിവിടുത്തെ നിയമം. ഏതു വണ്ടിയും വലതു വശത്തുനിന്നും കടന്നു പോകാനുള്ള വാഹനങ്ങളെ കടത്തി വിടണം. ഞാൻ ഇൻഡിക്കേറ്റർ ഇട്ടിരുന്നതു കൊണ്ടാണ് എതിരെ നേരെ വന്ന വണ്ടിയും നമുക്കു വലത്തോട്ടു തിരിയാനായി നിർത്തിയത്. “നമ്മുടെ വലതു ഭാഗത്തു നിന്ന് ഏതെങ്കിലും വണ്ടി കടന്നുപോകാനുണ്ടോ എന്നു മാത്രം നമ്മൾ നോക്കിയാൽ മതി. അവർ നമ്മളെ വന്നിടിച്ചാൽ അതവരുടെ തെറ്റാണ്. നമ്മുടെ ചെലവുകൾ കൂടാതെ നല്ലൊരു തുക ഫൈൻ ആയി കോടതിയിൽ അവർക്കു കെട്ടേണ്ടിയും വരും.

“അതേ നിയമം തന്നെയാണ് നമ്മുടെ നാട്ടിലും ഉള്ളതെന്ന യാഥാർഥ്യം പിന്നീടു മനസ്സിലാക്കിയപ്പോഴാണ് ഞാൻ സത്യത്തിൽ ഞെട്ടിയത്. എറണാകുളത്തു നിന്നു ന്യൂസീലൻഡിലേക്കു കുടിയേറിയ ഫൊട്ടോഗ്രഫർ സജി സാരംഗധർ അവിടത്തെ ഡ്രൈവിങ് സംസ്കാരത്തെപ്പറ്റി വിവരിക്കുന്നു.

 റസ്ട്രിക്റ്റഡ് ലൈസൻസ്