സംരഭകത്വത്തിൽ നാലുപതിറ്റാണ്ടിന്റെ വിജയഗാഥ എ വി അനൂപ്

ഫീച്ചർ ഫിലിം, ഡോക്യുമെന്ററി, ഷോർട്ട് ഫിലിം വിഭാഗങ്ങളിൽ പനോരമ തിരഞ്ഞെടുക്കൽ ആസ്വദിക്കുന്ന ചുരുക്കം ചില നിർമ്മാതാക്കളിൽ ഒരാളാണ് ഞാൻ

അസ്തമയസൂര്യന്റെ കിരണങ്ങൾ പൊൻവർണ്ണചാരുതയേകിയ പെരിയാറിന്റെ തീരത്തുള്ള അപ്പാർട്ട്മെന്റിന്റെ ഒൻപതാം നിലയിലെ സ്വീകരണമുറിയിൽ വച്ച് എവിഎ ഗ്രൂപ്പ് ഓഫ് കമ്പനീസിന്റെ ചെയർമാനും മാനേജിംഗ് ഡയറക്ടറുമായ എ വി അനൂപിനെ കണ്ടുമുട്ടുമ്പോൾ ആത്മവിശ്വാസത്തിന്റെ നേർക്കാഴ്ചയതന്നെയായിരുന്നുവത്. ആയൂർവേദത്തെ ലോകജനതയ്ക്ക് മുന്നിൽ എത്തിക്കാൻ അക്ഷീണം പ്രവർത്തിച്ച് വിജയപഥത്തിലെത്തിച്ച വ്യക്തി എന്നതിലുപരി തൊട്ടതെല്ലാം പൊന്നാക്കുന്ന സമ്പൂർണ്ണ സംരംഭകൻ. മെഡിമിക്സിൽ തുടങ്ങി ഇന്ന് നൂറ്റാണ്ടുകൾ പഴക്കമുള്ള നീലഗിരി ബ്രാൻഡ് സ്വന്തമാക്കുമ്പോളത് ജനങ്ങൾക്കിടയിൽ സംസാരവിഷയമായി.

വിപുലീകരണത്തിലൂടെ

നീലഗിരി സൂപ്പർമാർക്കറ്റ് ശൃംഖലയുടെ 67 കോടിയുടെ ഈ ഏറ്റെടുക്കൽ അദ്ദേഹത്തിന്റെ നേട്ടങ്ങളുടെ കിരീടത്തിലെ പൊൻ തൂവലാണെന്നുള്ളത് സംശയലേശമന്യേ പറയാം. ഈ ഏറ്റെടുക്കലിലേക്കെത്തപ്പെട്ടതിനെക്കുറിച്ചുള്ള ചോദ്യത്തിന് അദ്ദേഹത്തിന്റെ മറുപടിയിതായിരുന്നു. "ചില്ലറ വ്യാപാരമാണ് ഞങ്ങളുടെ ബിസിനസിന്റെ ആണിക്കല്ല്, അതിനാൽ അതിന്റെ വിപുലീകരണമാണ് ഈ ഏറ്റെടുക്കലിന് എന്നെ പ്രേരിപ്പിച്ച പ്രധാന ഘടകം. “വ്യക്തിഗത പരിചരണോൽപ്പന്നങ്ങൾ ഞങ്ങളുടെ പ്രത്യേകതയാണ്, അവയിൽ ബാഹ്യമായ ഉപയോഗത്തിന് വേണ്ടിയുള്ള ഉൽപ്പന്നങ്ങൾ മാത്രമല്ല ആന്തരികോപയോഗത്തിനുള്ളവയും ഉൾപ്പെടുന്നു. നീലഗിരി ബ്രാൻഡ് ഉൽപ്പന്നങ്ങളിൽ ജനപ്രിയമായ പാലുൽപ്പന്നങ്ങളും ബേക്കറിയും ഉൾപ്പെടെ അവരുടെ സ്വന്തം എക്സ്ക്ലൂസീവ് ഉൽപ്പന്നങ്ങളുണ്ട്.