ചില്ലുമച്ച് തകർത്ത യുവതി

വാലന്റീന തെരഷ്കോവ

- പി.എം.സിദ്ധാർത്ഥൻ

നമ്മുടെ സമൂഹം തീർത്ത അദൃശ്യമായ ഒരു ചില്ലുമച്ച് (Glass ceiling) എല്ലാ പെൺകുട്ടികളുടെയും ഉന്നതിയിലേയ്ക്കുള്ള വഴിയിൽ ഉണ്ട്. ഉയർന്ന ജോലികളിലും നേതൃത്വം നല്കുന്നതിലും ഒരു പരിധിയിലധികം ഉയരേയ്ക്ക് പോകുന്നതിൽ നിന്നും സ്ത്രീകളെയും പെൺകുട്ടികളെയും തടഞ്ഞു നിർത്തുന്നതിനെയാണ് ചില്ലുമച്ച് എന്ന് പറയുന്നത്. പക്ഷേ, നിശ്ചയദാർഢ്യമുള്ളവർ അതൊക്കെ തകർത്ത് ഉയരങ്ങളിലെത്തും. ആണുങ്ങൾ മാത്രം വിഹരിച്ചിരുന്ന ബഹിരാകാശയാത്ര എന്ന അതീവ ക്ലേശകരമായ രംഗത്ത് തന്റെ നിശ്ചയ ദാർഢ്യം കൊണ്ടുമാത്രം കടന്നുചെല്ലുകയും ആദ്യമായി ബഹിരാകാശത്തു യാത്രചെയ്ത് ചരിത്രം സൃഷ്ടിക്കുകയും ചെയ്ത ഒരു തുണിമില്ല് തൊഴിലാളിയായ യുവതിയാണ് വാലന്റീന തെരഷ്കോവ എന്ന സോവിയറ്റ് പൗര.

ഒരു ട്രാക്ടർ ഡ്രൈവറുടെയും തൊഴിലാളി സ്ത്രീയുടെയും മകളായിരുന്നു വാലന്റീന. 1939 ൽ ഹിറ്റ്ലറുടെ പിന്തുണയോടെ ഫിന്നിഷ് പട്ടാളം സോവിയറ്റ്യൂണിയനെ ആക്രമിച്ചപ്പോൾ, വാലന്റീനയുടെ അച്ഛൻ യുദ്ധത്തിൽ പങ്കെടുക്കവേ മരണമടഞ്ഞു. അന്ന് വാലന്റീനക്ക് രണ്ടു വയസ്സേ ആയിരുന്നുള്ളൂ. അച്ഛനെ കാണാതെ വളർന്ന മകൾ പതിനെട്ട് വയസ്സായപ്പോൾ അമ്മയെ സഹായിക്കാനായി തുണി മില്ലിൽ ചേർന്നു. ജോലിയോടൊപ്പം പഠനവും തനിക്ക് വളരെ ഇഷ്ടപ്പെട്ട  സ്കൈ ഡൈവിംഗും (ആകാശത്തിൽ വളരെ ഉയരത്തിൽ നിന്നും പാരച്യൂട്ട്  ഉപയോഗിച്ച് താഴേക്ക് ചാടൽ) പഠിച്ചു. ആദ്യത്തെ സ്കൈ ഡൈവിംഗ് നടത്തിയത് തന്റെ 22-ാമത്തെ വയസ്സിലായിരുന്നു.