എനിക്ക് പ്രിയപ്പെട്ട ഉല്ലാസയാത്ര

വരിയും വരയും

സ്കൂൾ തുറക്കാൻ കാത്ത് വീട്ടിൽ ബോറടിച്ചിരിക്കുമ്പോഴാണ് ഒരു അറിയിപ്പ്. യുറീക്ക ബാലവേദിയുടെ നേതൃത്വത്തിൽ ഒരു പഠനയാത്ര! പാലക്കാട്ടെ നിത്യഹരിതവനമായ സൈലന്റ് വാലിയിലേക്ക്. ഒരു ഒന്നൊന്നര അനുഭവമായിരുന്നു അത്.

രാവിലെ ആറുമണി കഴിഞ്ഞ് യാത്ര ആരംഭിച്ചു. 20 കുട്ടികളും 6 മുതിർന്നവരും കൂടി ഒരു ട്രാവലറിൽ. “കലാപരിപാടികൾ ആരംഭിക്കാണ് ട്ടോ, കൂയ്...” ആടിപ്പാടി ഒരു പെട്രോൾ പമ്പിലെത്തി. അവിടെ നിന്ന് വണ്ടിയിൽ കരുതിയ രാവിലത്തെ ഭക്ഷണം കഴിച്ചു - ഉപ്പുമാവും പഴവും വെള്ളവും. നാട്ടിൻപുറത്തുകാരുടെ അടിപൊളി കോപിനേഷൻ. ആഹാ! വീണ്ടും യാത്ര ആരംഭിച്ചു. സൈലന്റ് വാലി എന്നത് ഒരു നിത്യഹരിത വനമാണേ... യാത്ര മലയോര പ്രദേശങ്ങളിലൂടെയായിരുന്നു. ഇടയിൽ വലിയ വലിയ ഗർത്തങ്ങളുണ്ട്. എന്ത് ഭംഗിയാണെന്നോ കാണാൻ ആ വഴിയിലൂടെ സഞ്ചരിച്ചപ്പോൾ ചെവി അടയുകയും തുറക്കുകയും ചെയ്തു.