പന്നിയല്ലാത്ത, മുള്ള് എയ്യാത്ത മുള്ളൻപന്നി

ഓട്ടത്തിനിടയിൽ ചിലത് പൊഴിഞ്ഞ് വീഴും എന്നുമാത്രം!

- വിജയകുമാർ ബ്ലാത്തൂർ

മുള്ളൻ പന്നി എന്നു മാത്രമല്ല എയ്യൻ പന്നി എന്നു വരെ എനിക്ക് പേരിട്ടുകളഞ്ഞു ഈ മനുഷ്യര്. ആരൊക്കെയോ പറഞ്ഞുണ്ടാക്കിയ കഥയാണിത്. എനിക്കങ്ങനെ ഒരു കഴിവില്ല. എന്റെ രോമമാണ് മുള്ളായി പരിണമിച്ചത്. ഓട്ടത്തിനിടയിൽ ചിലത് പൊഴിഞ്ഞ് വീഴും എന്നു മാത്രം. അല്ലാതെ അമ്പെയ്തു കൊള്ളിക്കും പോലെ മുള്ള് എയ്യാൻ ഞങ്ങൾക്കാവില്ല. 

കെരാറ്റിൻ കൊണ്ട് ഉറപ്പുള്ളതാക്കിയ ഞങ്ങളുടെ ഉള്ളുപൊള്ളയായ രോമം - നിങ്ങൾക്ക് രോമാഞ്ചം ഉണ്ടാകുമ്പോൾ പൊങ്ങി നിൽക്കുന്ന രോമം പോലെയല്ല. ഓരോ രോമവും അതിന്റെ അടിയിലെ പേശിയുമായി നേരിട്ട് ബന്ധിച്ചിട്ടുള്ളതിനാൽ ഇഷ്ടം പോലെ ഇത് ഉയർത്താനും താഴ്ത്താനും ചെറുതായി ചലിപ്പിക്കാനും കഴിയും. അങ്ങനെ അവ കുലുക്കി ഒച്ചയുണ്ടാക്കി പേടിപ്പിക്കാനും ആവും.

ഏതവനാണാവോ എനിക്ക് പന്നി എന്നു പേരിട്ടത്? പൊർ കുപ്പിൻ എന്ന കിടിലൻ പേരുണ്ടല്ലോ എനിക്ക്. എന്റെ കിങ്കിരി പല്ലും ഓമനത്തമുള്ള ഈ മുഖവും കണ്ടിട്ടും പന്നി എന്ന് വിളിച്ച ആളെ സമ്മതിക്കണം അണ്ണാനും എലിയും ഒക്കെ ഉൾപ്പെടുന്ന റോഡന്റുകളുടെ - കരണ്ട് തീനികളുടെ കൂട്ടത്തിൽപ്പെട്ടവരാണ് ഞങ്ങൾ. പന്നികളുമായി ഒരു ബന്ധവും ഇല്ല.

അനങ്ങും തോറും ആഴത്തിലേക്ക്