പ്രകൃതിയുടെ സമ്മാനങ്ങൾ

കന്നിമഴക്ക് ഭൂമിയിൽ പതിക്കുന്ന ജലം സ്പോഞ്ച് പോലെ വലിച്ചെടുത്ത് വൃക്ഷവേരുകൾക്ക് വെള്ളം ലഭിക്കുവാനും, കിണറുകൾ വറ്റാതെയിരിക്കുവാനുമെല്ലാം ഈ ഉണക്കപ്പുല്ലുകൾ ആവശ്യമാണ്

- മിനി സുരേഷ്

അന്നേരം ലീലാമണി മുത്തശ്ശി മുറ്റത്തെ ഉണങ്ങിയ പുല്ലുകളെല്ലാം പറിച്ചെടുത്ത്, ചപ്പു ചവറുകളും കൂട്ടി തീകൊളുത്തുകയായിരുന്നു. എന്നേരം? ഉച്ചക്ക്.. ഉണ്ണിക്കുട്ടൻ സൈക്കിളിൽ അതു വഴി വന്ന നേരത്ത്..

മുത്തശ്ശി വീട്ടിൽ ഒറ്റക്കാണ് താമസം എന്നറിയാമല്ലോ. മക്കളെല്ലാവരും വിദേശത്തല്ലേ.. മുത്തശ്ശിക്കാവശ്യമായ മരുന്നുകളും, വീട്ടുസാധനങ്ങളുമെല്ലാം സൈക്കിളിൽ പോയി വാങ്ങിച്ചു കൊണ്ടുവരുന്നത് കുറേ നാളായി അടുത്ത വീട്ടിലെ ഉണ്ണിക്കുട്ടനാണല്ലോ. ശരിക്കും ഒരുഗ്രൻ സഹായി..

“മുത്തശ്ശിക്ക് വയ്യാത്തതല്ലേ. ഒരു ഭാഗത്ത് അടങ്ങിയിരുന്നു കൂടേ.” അവൻ സ്നേഹത്തോടെ ചോദിച്ചു. എപ്പോഴും അടങ്ങിയിരുന്നാൽ കൈയും, കാലുമൊന്നും അനക്കുവാൻ സാധിക്കാതെ വരും മോനെ. പണ്ടുള്ളവർ പാടത്തും, പറമ്പിലുമൊക്കെ നല്ലതു പോലെ മെയ്യനങ്ങി പണിയെടുക്കുമായിരുന്നു. അതായിരുന്നു പഴയതലമുറയുടെ ആരോഗ്യ രഹസ്യം.