'ஹிண்டன்பர்க்...அதானி...செபி...

பங்குச் சந்தை, பரிவர்த்தனை, வர்த்தகம் என்றாலே அங்கு ஊழல் களும், ஏமாற்று வேலைகளும், பரபரப்புகளும் இருக்கும் என்பது எழுதப்படாத விதிபோல!

- பேராச்சி கண்ணன்

ஏனெனில், சமீபத்திய ஹிண்டன்பர்க் குற்றச்சாட்டுகள் இந்தியப் பங்குச் சந்தையில் மீண்டும் ஒரு புயலைக் கிளப்பியிருக்கிறது.

இந்தமுறை அதானி குழுமம் மட்டுமல்ல; செபி எனப்படும் இந்திய பங்கு மற்றும் பரிவர்த்தனை வாரியத்தின் தலைவர் மாதபிபுரி புச்சும் அவரின் கணவர் தாவல் புச்சும் மீதும் குற்றச்சாட்டுகளை அடுக்கியிருக்கிறது ஹிண்டன்பர்க் நிறுவனம்.

இதற்கு எதிர்க்கட்சிகள் கடும் கண்டனங்களைத் தெரிவித்து வருகின்றன. இதனால் ஹிண்டன்பர்க், அதானி, செபி தலைவர் எனப் பிரச்னை பூதாகரமாக சுழன்றுகொண்டிருக்கிறது.

யார் இந்த ஹிண்டன்பர்க்? என்ன விவகாரம்?

அமெரிக்காவின் நியூயார்க்கை தலைமையிடமாகக் கொண்ட ஒரு முதலீட்டு ஆராய்ச்சி நிறுவனமே ஹிண்டன்பர்க். இவர்கள் தங்களை 'Specialises in forensic financial research' எனக் குறிப்பிட்டுக் கொள்கின்றனர்.

அதாவது தடயவியல் துறை போல நிதித்துறையில் அனைத்தையும் அக்குவேறு ஆணிவேறாக ஆராய்ச்சி செய்யும் நிபுணத்துவம் பெற்ற நிறுவனம் எனப் பறைசாற்றிக் கொள்கின்றனர்.

இதில் குறிப்பாக பங்குச் சந்தை, கடன் மற்றும் நிதி சம்பந்தமான பகுப்பாய்வுகளில் கவனம் செலுத்துகின்றனர்.

இந்நிறுவனத்தை கடந்த 2017ம் ஆண்டில் நாதன் ஆண்டர்சன் என்பவர் தொடங்கினார். இதற்கான பெயர் அவர் வைத்ததுகூட தனிக்கதைதான்.

ஆம், 1937ல் அமெரிக்காவின் நியூஜெர்சி அருகே வெடித்த ஒரு ஏர்ஷிப்பின் பெயரே ஹிண்டன்பர்க். இதில் 35 பேர் உயிரிழந்தனர்.

இது மனிதனால் உருவாக்கப்பட்ட முற்றிலும் தவிர்க்கக்கூடிய ஒரு பேரழிவு என்கிறது இந்நிறுவனம். இதேபோல சந்தையில் மனிதர்களால் உருவாக்கப்படும் பேரழிவுகளை முன்னதாகவே வெளிச்சம் போட்டுக்காட்டும் நோக்கத்துடன் ஹிண்டன்பர்க் எனப் பெயரிட்டோம் என்கிறது அதன் இணையதளம்.

இந்நிறுவனம் 2023ம் ஆண்டு ஜனவரி மாதம், 'அதானி குழுமம்: உலகின் 3வது பெரிய பணக்காரர், எப்படி கார்ப்பரேட் வரலாற்றில் மிகப்பெரிய பேரழிவை ஏற்படுத்துகிறார்' என்ற தலைப்பில் ஓர் ஆய்வினை வெளியிட்டது.

அதில், அதானி நிறுவனத்தில் பல தசாப்தங்களாக நடந்த கணக்கு மோசடி, பங்குகளைக் கையாளுதல் மற்றும் பண மோசடி ஆகியவற்றின் ஆதாரங்களை எங்களின் இரண்டு ஆண்டு விசாரணையின் மூலம் கண்டுபிடித்துள்ளோம் எனக் குறிப்பிட்டது.