സാങ്കേതിക മാറ്റങ്ങൾ അനിവാര്യം പൃഥ്വിരാജ്

മാസ്സ് ചിത്രങ്ങളോടുള്ള പ്രേക്ഷകപ്രിയം ഒരിക്കൽക്കൂടി ഉറപ്പിക്കുകയാണ് 'കടുവ'യുടെ വിജയം. നൂതനസാങ്കേതികവിദ്യകൾ തിയേറ്ററുകളിലും ഉപയോഗപ്പെടുത്തി മലയാളസിനിമകളെ ദേശീയ, അന്തർദേശീയ തലങ്ങളിലേക്ക് ഉയർത്താമെന്നതിനെക്കുറിച്ചും 'കടുവ'യുടെ വിജയത്തെക്കുറിച്ചും ആ ചിത്രത്തിന്റെ വിശേഷങ്ങളും അണിയറക്കാർ ‘നാന'യ്ക്കൊപ്പം പങ്കുവെയ്ക്കുന്നു.

- പ്രതീഷ് ശേഖർ

കടുവയിൽ എത്തിയതിനെക്കുറിച്ചും കഥാപാത്രത്തെക്കുറിച്ചും പറയാമോ?

പൃഥ്വിരാജ്. ആദ്യം തിരക്കഥ കേട്ടപ്പോൾ മനസ്സിൽ തോന്നിയത് ഏറെ നാളായല്ലോ ഇതു പോലൊരു കഥ കേട്ടിട്ട് എന്നാണ്. കണ്ടിട്ടും ഏറെ നാളായി. മാസ് മസാല ആക്ഷൻ എന്റർടെയ്നർ ഗണത്തിൽ പെടുന്ന ചിത്രങ്ങൾക്ക് എന്നും പ്രേക്ഷകപ്രിയമുണ്ട്. ധാരാളം നല്ല സിനിമകൾ ചെയ്യുന്ന ഒരു കാലഘട്ടത്തിലുടെയാണല്ലോ നാമിപ്പോൾ കടന്നു പോകുന്നത്. ഒരുപാട് കണ്ട് സ്നേഹിച്ച സൃഷ്ടിക്കാൻ മറന്നു പോയൊരു തരത്തിലുള്ള ഒരു വലിയ ക്യാൻവാസിൽ വരുന്ന സിനിമയാണിത് എന്നതാണ് പ്രത്യേകതയും. അഭിനയിക്കുമ്പോഴും കണ്ടപ്പോഴും ഏറെ എൻജോയ് ചെയ്ത സിനിമയാണ് കടുവ.

കടുവാക്കുന്നേൽ കുറുവച്ചന്റെ കഥാപാത്രം ഉപയോഗിക്കുന്ന വാഹനങ്ങളുടെ നമ്പറുകൾ ഏഴിൽ തുടങ്ങി ഏഴിൽ അവസാനിക്കുന്നുവല്ലോ?

പൃഥ്വിരാജ്: ജനഗണമനയും കടുവയും രണ്ടും ധാരാളം പ്രതിസന്ധികൾ നേരിട്ട സിനിമകളാണ്. 2020 ൽ തുടങ്ങിയ സിനിമകളാണ്. കോവിഡ്, പ്രളയം, ഉരുൾപൊട്ടൽ എന്നിങ്ങനെ ധാരാളം പ്രശ്നങ്ങൾ നേരിട്ടു. പക്ഷേ അവ റിലീസ് ആകുന്ന സമയം എന്നത് പ്രേക്ഷകർ ഈ ജനുസ്സിൽ പെട്ട ചിത്രങ്ങൾ കാംക്ഷിക്കുന്ന സമയമായി വന്നു ചേർന്നതു പോലെ ഇതും യാദൃച്ഛികം.

ഇതൊരു നാടൻ ഇടിപ്പടമാണോ?